Zaninah 2-Wheeler Taxi Driver tlangzarh dawn

Entertainment Society of Mizoram buatsaiha Best Film Award 2023 latu, Zote Entertainment kutchhuak, '2-Wheeler Taxi Driver' film chu zanin hian tlangzarh a ni dawn ta.

Film tlangzarhna programme hi Zonuni Pachuau-in a kaihruai dawn a, Zonet Director Lalnunpuia'n a tlangzarh ang. Film OST hi tunlaia zaithiam boruak nei lian ber zinga mi, H.O.M chuan nalh takin a sa a, zaninah pawh a perform dawn.

He film hi 2-wheeler taxi driver pakhatin harsatna a tawh, inbumna, phatsanna leh chumiin a nun a thlak danglamsak dan thawnthu niin, action, thriller, romance leh comedy a inpawlh nuk ang.

'2-Wheeler Taxi Driver' director hi Mike niin, Aruata Fanai chu Assistant director a ni a, director of photography chu Ruattea a ni. He film-ah hian Serchhip nula, Malsawmsangi chu a changtunu ber a ni a, a changtupa hi zaithiam, 'Ka U Liana' film-a hneh taka lo chang tawh Vanlalhmangaiha a ni.

Anni bakah Mizo film lama kan lo hmelhriat lar tawh - Maneihi Fanai, Nu Machhungi, Aaron Malsawmdawngzuala, Issac Chawngthu leh Lalmuanpuia Renthlei te an inlan bawk a ni.