A fan-te'n Zyan Malik Urdu single an hlut

One Direction member hlui, Zyan Malik chuan Pakistani band, Aur thawhpuiin Urdu hla a tichhuak a, a fan-te'n an hlut hle.

Malik-a Urdu single hi 'Tu Hai Khan' (Where are you?) tih niin, Aur band hit an remake a ni. Original song hian view mtd. 100 chaung a nei a, mahse, Malik-a hoa an remake hian kar hnih chhung lekin view mtd. 9 a nei tling tawh. Aur band member Usama Ali, Ahad Khan leh Raffey Anwar-te hi Karachi-a mi vek an ni a, Zyan Malik an thawhpui thei chu an ṭhiante leh chhungte ngei pawhin an ring pha lo tih sawiin, nuam an ti hle. Malik pawh hian Aur band-in thawhpui tura an sawm chu lawmawm a tih thu leh, an hla pawh hi mawi a ti hle tih a lo sawi tawh bawk. Kum 31 mi, Malik hi UK-a piang leh seilian a ni a, a pa hi Pakistan aṭanga pem lut a ni. Kum 2010-a TV music competition, The X Factor-a boy band, One Direction siamah telin, hemi aṭang hian a music career hi a rawn ṭan a ni.