Lollapalooza India 2024 zo fel ta

Global music festival, Lollapalooza 2024 chu January 27 leh 28 khan Mahalaxmi Race Course, Mumbai-ah neih a ni.

Ni hnih awh international music festival-ah hian Indian artist bakah international artist larte pawh an inlan nual. Lollapalooza hi kum 1991 aṭang khan neih ṭan a ni a, a tirah chuan touring event anga neih niin Chicago, US chu permanent location-ah hman a ni bawk. Mahse kum 2010 aṭang khan Chicago-a neih bakah, US pawn lamah buatsaih tel a ni chho a, Chile, Brazil, Argentina, Germany, France leh Sweden-ah te neih tel a ni a, Asia-ah a vawi khatna turin nikum khan Mumbai-ah neih niin, mi 60,000 velin an chhim.

Kumin Lollapalooza India-ah hian genre hrang hranga artist 40 chuang an perform a, an zingah hian khawvel huapa lar Sting, Jonas Brothers, Halsey, Lauv, OneRepublic leh The Rose-te an tel. Indian artist zingah When Chai met Toast, The Raghu Dixit Project, Jatayu, Skrat, Kamakshi Khanna, JBABE, Anoushka Shankar leh Fatoumata Diawara te pawh an inlan a ni.