Jay-Z in kuminah album thar tihchhuah tum lo

'Dirt Off Your Shoulder' rapper, Jay-Z chuan album a tichhuak dawn nia thuthang awm mah se, kumin chhungin album thar tihchhuah a tum lo tih a sawi.

Jay-Z entertainment company, Roc Nation chuan Pathianni khan social media lama thuthang awm hi a rawn hrilh fiah a, kum 54 mi hip-hop artist-in album thar a tichhuak dawn nia sawi chu anni pawhin an lo hriat loh thu an sawi. Jay-Z full-length solo album tihchhuah hnuhnung ber chu kum 2017-a mi, 4:44 kha niin, Billboard 200-ah kar hnih chhung no. 1 a nihpui. Kum 2018 khan a nupui, Beyonce nen The Carters tiin 'Everything Is Love' an tichhuak bawk. Tunah hian Roc Nation-in Super Bowl LVIII Halftime Show a produce tur lam a buaipui mek a, he show-ah hian Usher chu headline a ni dawn a ni.