Khiangte Construction Ṭhazual Lengzem : Boruak nei lian Mary Dawngi'n hma a hruai

Khiangte Construction Ṭhazual Lengzem-ah tunlaia boruak nei lian ber pawl, Mary Dawngi chuan 'Se bo hnu' tih hla hmangin hma a hruai.

'Se bo hnu' hi tunlaia Mizo hla ṭha leh lar tak tak phuahtu, SaiWanah phuah a ni a, Mary Dawngi hian nikum November 3 khan a YouTube channel-ah a dah chhuak a ni. Videographer hi HORIZON niin; music, mixing & recording hi Randy Zaitea (Vulmawi Studio) kutchhuak a ni a, director hi Mario Puia a ni.

Mary Dawngi hian hun ṭha a tawng mek a, SaiWanah nen 'Ka Pa Khuma' an hit-pui hnuah, Youngfella nena an thawh dunna, 'Duhaisam' a rawn hit leh, YouTube-a Mizo hla dah zingah million view nei rang ber an ni thei a ni. Tuna a single, 'Se bo hnu' chu chart no. 1-ah a rawn lanpui leh ta bawk.

Ṭhazual Chart-ah Mizo Idol aṭanga kan hriat lar, Saka 'Ka hmangaih che (Tunge I Hming ost)' chu pahnihnaah a rawn kai chho bawk a, Puipuia Chhakchhuak 'Lunglen hnemtu' pawhin hma rawn sawnin pathumna a rawn luah. Marshall Fka, Jox Cool, Lazzy Ralte, Hruaii-te thawhhona 'Lo kir leh rawh' leh, Lawmi Chhakchhuak 'Riahrun I rem dun ang' te chu Top 5-ah an lang bawk a ni.