John Mayer-a'n 'Imagine' a hriatpawlh em ni?

Tunlaiin hripui lengin khawvel a tichiaia a, buaina hrang hrang a thlen thu bak chhiar tur awm meuh lo karah thu hlimawm lampang han tarlang ve zeuh ila a ṭha awm e. 

'Gravity' hitmaker John Mayer chu Instagram-a live programme a hman ṭhin, a Current Mood show-ah a inpuang a, celebrity hoin tunlaia an uar em em, John Lennon hla 'Imagine' an cover-na video an dahkhawmah chuan tel ve tura an sawm thu sawiin, an hla sak tur a lo hresual bik tih a sawi a, a fan-te pawhin an lawm hle.

Wonder Woman star Gal Gadot bulṭan, 'Imagine' hla cover tura an sawmnaah chuan Mayer hian hla a lo hresual a, Ariana Grande hla 'Imagine' zawk emaw lo tiin, a cover lai video-te pawh a lo nei hman tih a inpuang.

Current Mood show-ah pawh hian a zai lai thlalakte chu a tilang nghe nghe a ni.

Covid-19 a darh zel a, celebrity-te pawh an tawm ima, an tihtur hre lo chu social media lamah hmuh tur an tam ve hle.

John Lennon hla 'Imagine' hi Gal Gadot-in a cover hnuah milar tam takin an intihhmuh nasa hle a, Jimmy Fallon, Natalie Portman, Zoë Kravitz, Amy Adams, leh Mark Ruffalo-te pawhin an cover tawh.

John Mayer hi pa fiamthu duh tak a ni ve hrim hrim a, stand up comedy-te pawh a ti ve zeuh zeuh tawh ṭhin. Current Mood show hmasaah khan album thar a buaipui thu a sawilang tawh a, Covid-19 reh hunah hi chuan a tlangzarh turah ngai ang.



Share this Post

Login to comment
No Comments