
MLA thar 23-te'n Parliament-ah ram rorelna kalphung an zir mek
Mizoram Member of Legislative Assembly (MLA) tling tharte tan nimin khan New Delhi-a Parliament building-ah Parliamentary Research and Training Institute for Democracies (PRIDE) chuan 'Orientation for Newly Elected Members of Mizoram Legislative Assembly' tih thupui hmangin training an buatsaih a; MLA-a vawi khatna atana tling mi 23 an tel.
Training hawnnaah hian Assembly speaker Lalbiakzama chuan, Mizoram sorkarin mipui nena kal rual leh sorkar harhvâng tak nih an tum thu a sawi a, "Mizoramin chhuan tur nei lo mah se, state rálmuang ber a nihna te, harsatna leh buaina avanga ṭhenawm ram Myanmar leh Bangladesh bakah, state ṭhenawm Manipur aṭanga sahimna zawnga pantute duat taka tuamhlawm a ni hi thil chhinchhiah tlak a ni," a ti.
Mizoram aṭanga MLA kalte chuan ram rorelna kalphung chungchanga an thil zirte beiseina sang tak nen ṭangkai taka hman an tum thu sawiin Speaker chuan, "Mizoram tana thil ṭha leh thil thar zir chhuak turin kan tuihâl a ni," a ti a; MLA-te chu training hming pua hun hmang ral satliah mai lo a, hman ṭangkai tuma ngaihtuahna séng tur leh theihtawp chhuah turin a chah.