Wonder Woman 1984 tlangzarh hun tikhawtlai ve ta

Coronavirus-in film industry a nghawng lian zel a, kumin chhunga film chhuak tur zinga nghahhlelhawm ber pawl Wonder Woman 1984 tlangzarh hun tur pawh an tikhawtlai ve leh ta.

Kum 2017-a tihchhuah  DC Extended Universe (DCEU) film Wonder Woman chhunzawmna Wonder Woman 1984 hi June 5-a tlangzarh tum a ni a, mahse Covid-19-in film industry nasa taka a nghawng avangin film dang tam tak hnungzuiin tlangzarh hun tur hi an tikhawtlai ve ta a,  August 14-a tlangzarh turin ruahmanna thar an siam.

WW 1984 hi  Patty Jenkins direct a ni a, Gal Gadot bawk chang lehin Chris Pine pawh a inlan leh dawn bawk.

Kum 1984 kuma thilthleng anga chang a ni dawn a,  Ama­zonian nula Diana hian DC villain Maxwell Lord leh Cheetah-te a hmachhawn dawn a ni.

June, 2018 aṭang khan chan ṭan a ni tawh a, teaser poster-te pawh tihchhuak vek tawhin film dang ang bawkin Covid-19 chuan a luhchilh ve leh ta a ni. Warner Bros. Motion Picture Group Chairman Toby Emmerich chuan tlangzarh hun tihkhawtlai a nih thu hi thu­chhuah siamin a tarlang a, "Tlang­zarh a nih hunah chuan khawvel hi hmun hrisel leh hmun him a nih leh tawh kan beisei," a ti.

Wonder Woman 
hmasa a hlawhtling


WW 1984 siamna atan 
hian an sum sen pawh 
a tam tham hle a, film 
bugdet hi $mtd 200 
a tling hial. A film hmasa 
zawk siamna atan khan 
$mtd 120-150 inkar vel 
an hmang a, a sum 
lakluh erawh a tam hle a, 
$mtd 821.8 lai 
a lalut thei a ni.


In the Heights tlangzarh hun sawn

American musical drama film In the Heights pawhin tlangzarh hun an sawn thu an tarlang.

June 26-a tlangzarh turin ruahmanna siam vek tawh mah se hripui leng vangin tlangzarh hun tur an sawn a, tiam chin awm loa tihkhawtlai a nih thu an tarlang a ni.

Covid-19 vang hian film nghahhlelhawm tak tak tlangzarh hun tihkhawtlai a tam tawh hle a, chung zingah chuan No Time to Die, Black Widow leh F9-te pawh a tel.



Share this Post

Login to comment
No Comments