Box Office-ah Mean Girls-in The Beekeeper a khum

North American box office-ah film thar tlangzarh rual zingah 'Mean Girls' chuan 'The Beekeeper' khumin no. 1 a ni.

'Mean Girls (2024)' hian tlangzarh aṭanga ni thum chhungin domestic-ah USD mtd 28 a la lut thei a, Australia leh Mexico-ah pawh no. 1 a ni bawk. American teen comedy film-ah hian Angourie Rice, Auli'i Cravalho leh Christopher Briney-te channaah hian Renee Rapp, Tina Fey leh Tim Meadows-te chuan 2004 original movie-a an role ngai an rawn chang leh a, Rotten Tomatoes-ah pawh critics review a hmu ṭha viau. He film entu tam ber, 76% hi hmeichhia an ni. Script hi Tina Fey ziah niin, Mark Waters direct a ni.

Jason Statham channa, action thriller 'The Beekeeper' chu no. 2-ah awmin, North America-ah USD mtd 16.9 la lutin, international market-ah USD mtd 20.4 a la lut bawk. He film hi mipa lamin an lawm thung a, ticket leitu zinga 62% chu mipa an ni.

Kar hmasa lama no. 1 hauhtu, 'Wonka' chu no. 3-ah a tla thla a, USD mtd 8.4 a hmuh belh leh a, a sum hmuh hi domestic-ah USD mtd 178 tling tawhin, khawvel huapa a lak luh hi USD mtd 500 a tling tawh. 'Anyone But You' chu a kar linaah no. 4-ah a la lang a, USD mtd 6.9 a lak luh belh leh. USD mtd 6.2 la luttu, 'Migration' chuan Top 5 a rawn khar.