Sir Ratcliffe hmaah Man United an ropui lo; Manchester United 2 - 2 Tottenham

Manchester United neitu thar tur Sir Jim Ratcliffe-a'n Old Trafford-ah Sir Alex Ferguson nen inkhel an thlir a, an beisei ang erawh an hmu kher lo ang. Erik Ten Hag-a hote hi Pathianni zan khan Tottenham Hotspur nen 2-2 in an inhnehtawk a, Man United inkhel a la nghet lo.

Mualneitu hian Rasmus Hojlund leh Marcus Rashford te goal hmangin ṭum hnih hma hruai mah se Spurs-in Richarlison leh Rodrigo Bentancur te goal hmangin an sut ve ve. Man United hian point khat chauh an hlawh chhuak a, table-ah erawh pasarihnaah an invawrchho thung.

Hei le, Hojlund

Inkhelh ṭan hmain Man United forward pahnih Hojlund leh Rashford te tun season league-a an goal khung belhkhawm chu goal li chauh a ni. Ratcliffe hmaah forward pahnih hian first half-ah goal a khung ve ve.

Minute thumna lekah Rashford-a'n box chhungah a khalh lut a, ball pek chhuahna chang hre lo mah se Hojlund-a'n chang fuhin goal-ah kawh pawtin a pet lut.

Hojlund hian theihna sang tak a nei tih a lang a, mahse goal hmaah a kum naupanna a lang leh ṭhin. Minute 40-naah Hojlund hian Rashford-a goal khung tur a siamsak a, English forwrard finishing hi a ṭhat em avangin Spurs keeper Guglielmo Vicario dem theih a ni lo.

Mahse maw...

Man United hian goal an khung hma a, an phur viau nachungin an lawm chhung a rei lo. Spurs number 9 Richarlison-a'n minute 19-naah si phurh sutna goal a tauh lut nghal a, Brazilian striker hi Aron Wan-Bissaka-a'n a veng hneh lo.

Mualneitu ang thoin Spurs tlarhnung pawh a nghet bik lo a, Destiny Udogie-a'n anmahni lam goal ban a tauh per. Rashford hmangin United-in hma hruai leh mah se tlarhnung lam an insiam rem thei lo. Spurs defender Cristian Romero-a'n crossbar a tauh per a, United tlarhnung corner kick an veng thei lo a ni ber.

Halftime-ah Man United-in 2-1 in hma hruai mah se second half ṭan chiahah Spurs-in si phurh an sut zo. Timo Werner-a ball pek chu Bentancur-a'n la lutin chiang zetin minute 46-naah a pet lut a, United tlarhnung an muthlu.

Ten Hag-a hote hian khualmualah Spurs lakah 2-0 in hma an hruai a, Ange Postecoglou hoten an sut zo. Tun ṭumah pawh United hian ṭum hnih ngawt hma hruai mah se an veng tluan thei lo.

Minute 90 chhunga an khelh dan thlirin 2-2 hi result awm tak a ni a, chutihrualin hun tawp hma chiahin Alejandro Garnacho cross chu vengtu nei lo Scott McTominay-a'n a tauh over.

Harhtharna mamawh

Man United tan Tottenham laka point khat hmuh hrim hrim hi result chhia a ni lo a, chutihrualin tun ṭuma Ten Hag-a hote hmachhawn Spurs erawh captain Son Heung-min awm lohna a ni a; James Maddison, Yves Bissouma, Dejan Kulusevski leh Pape Sarr te an awm lo bawk. Chutihrualin player thar Werner-a'n bul a ṭan a, bench aṭangin defender thar Radu Dragusin a lut bawk.

Mualneitu tan chak theihna hun ṭha angin lang mah se an muala an khel chungin 36% chauh ball an chang a, goal shot vawi kua chauh neiin target-ah vawi hnih chauh a kal.

Sir Ratcliffe-a mit tlung zo lo an awm nualin a rinawm. Inkhelh banah Ten Hag chuan, "Ṭum hnih hma kan hruai chunga kan chak zo lo erawh a pawi. Kan goal chhuahna a ho mah mah a, insiamṭhat kan ngai hle a ni," tiin a sawi.