Ruihhlo donaah ṭanrual a ngai

Excise & Narcotics Department chuan January 13, 2024 chhun khan 'Ruihho do chungchanga kohhran ṭhalai hruaitute nen inkawmhona' an buatsaih a; Chief Minister leh Excise Minister hoin kohhran pawl hrang hranga ṭhalaite'n awmze nei leh hlâwk zawka ruihhlo do dan tur an sawiho a ni. Hei hi thil ṭha tak a ni a, rah chhuah duhawm tak a neih ngei a beiseiawm hle.

Mizoramah hian ruihhlo, a bikin heroin a hluar tak zet a, ruihhlo dotu sorkar leh agency dangte pawhin an man tam tial tial. Excise-in kum 2023 chhunga an man zat kha a hma kum thum - 2020, 2021 leh 2022 chhunga an man belhkhawm aiin a tam zawk a, anni man zat thuak hi Assam Rifles-in an man bawk. Man chhuah loh tam tham tak a awm ngei bawk ang.

Ruihhlo do hi sorkar lama hma latu bik - Excise leh Police lam ringawt do hneh chi a ni lo a; Assam Rifles leh CYMA hnuaia Central Anti Drug Squad-te hmalaknate nen pawh a la tâwk zo lo. Sorkar leh agency hrang hrangin nasa taka ṭan an lâk bakah hian mipuiin kan theihna zâwnah ṭheuh ṭan kan lo lak ve a ngai a, tuna hma la la lo páwl dangte pawhin an phâk tâwk leh an tih àwm chinah theihtawpa ṭan an lo khawh ve a ngai âwm e.

Ruihhlo do a ni emaw, thil dangah emaw pawh ni se, kohhran leh a hnuaia ṭhalai pawlte hi mipuiah huháng nei lian an nih avangin, an phâk tâwkah ṭan an lo lak ve phawt chuan awmzia a nei ngeiin a rinawm.

Kohhran leh a ṭhalai pawlte hi chu ruihhlo man tuma hma lo la ve tur an ni lo ang a, ruihhlo ti lo tura an mi leh sate zirtir leh vên bakah, ruihhlo ti mekte'n an sim theih nan awmze nei takin hma an lâk theih ngei a rinawm a; tun aia na zawkin hma la thei se a duhawm hle. Kan rama ruihhlo hluar lutuk titlém tur leh tirêm tur hian sorkar, kohhran, pawl leh mipui kan ṭanrual a ngai tak zet a ni.