North America khuan kar tawp apiang hian Box Office-a sum lalut hnem chart an tichhuak ṭhin a, theatre an chhuahna zat leh an sum hmuhzat zawng zawng nen an tilang ṭhin. Chu chu film lam tuipui mite pawhin film ṭha an zawnna ber niin chumi tinzawn chuan Hollywood movie-te chu a tlangpuiin an ram huna Zirtawpniah an tlangzarh 

ṭhin reng a ni. Chumi chart chu Vanglaini pawhin kar tin kan tichhuak ṭhin a, mahse tun kar tawp liam taah erawh thil danglam a thleng a, Box Office chart a 'nil' a, chart tarlan tur a awm lo.

 Kum 26 chhunga a vawi khat thlenna

Kum 26 liam ta, kum 1994 khan Northridge lirnghing vangin Box Office a nil tawh a, mahse kar tawp vawi khat bak a ni lo.

Coronavirus darh zel vangin North America-ah chuan theatre zawng zawng deuh thaw khar a ngai a, Ningani liam ta thleng kha chuan theatre 400 vel chu hawn a la ni a, kar tawpah erawh kha chuan 300 vel chu la hawng mah se an sum hmuhchhuahte hi Box Office lamah an thlen lo nia a lan bakah theatre attendance drive pawh an nei lo. North America-ah khuan theatre 6,000 bawr vel a awm a, a vaia khar vek chu ni lo mah se an khar deuh vek a ni.

Thuchhuah siam hmasatu Disney

Film studio lian zual zingah chuan Disney-in Box Office-ah report an thehlut dawn lo tih an puang hmasa ber a, hun eng emaw chhung chu an report rih dawn lo tih an tarlang zui bawk.

"Khawvel hmun hrang hrangah theatre khar a nih avangin Disney chuan  global weekend reporting a titawp rih dawn a ni," tiin thuchhuah an siam. Hemi hnu hian studio lian dangte pawhin report an thehluh dawn loh thu an tarlang zui a ni.

Eng chen nge theatre an khar dawn?

Threatre chain lian pathum AMC, Regal leh Cinemark-te chuan ram pumah an theatre an khar rih dawn tih an puang a, kar riat aṭanga kar 12 vel chu an khar a ngaih an rin thu sawiin, hei aia rei pawh hi an khar a ngai mai thei tih an sawi bawk.

Theatre-te hian sor­kar ṭanpuina an ngen a, theatre te deuhte phei chu a nghawng nasa dawn hle a, an khar hlen hial a ngai mai thei!

Theatre hrang hrang hian a tirah chuan social distancing kalpui hma­sain, ticket pawh a chan­ve chiah zuar chhuak hlawm­in an customer-te pawh ft 6 danah an ṭhuttir a ni. Mahse hei hi a tawk lo tih hriain theatre hrang hrang chu an khar zui ta a ni.

Share this Post