Lersia Play Top Chart : December-a Mizo film hralh hnem ber 'Tleitiri'

December, 2023 chhunga Mizo film streaming app, Lersia Play aṭanga film hralh chhuah hnem ber chu 'Tleitiri' a ni.

'Tleitiri' hi December 19, 2023 khan release a ni a, retheihnain chhungkaw pakhata chhiatna a thlen dan a ni. Hei bakah tunlai sikul kalphung tarlanna niin, Pathian thu ze dik tarlanna a ni tel bawk. A film hi a lungngaihthlak rualin a hlimawm lam hmuh tur a tam thung. Director hi Mapuia (M Jay Pictures) a ni a, producer leh story writer, JS Tharmawii, director of photography, Saktea16 a ni. A changtunuah Ms. Smiley changin, misualnu-ah 'Ambush'-a changtu, Marilyn Chhanchhani a chang bawk.

December thla chhunga film hralh hnem pahnihna chu Mastea channa, 'Archangkawm 2' a ni. Rinkson Entertainment film siamah hian Lalnuna leh Lalmuana-te bawk kan hmu leh a, a hlimawm leh hle. He film hi November thlaa film hralh chhuah tam paruknaah a lo lang tawh bawk a ni.

Pathumnaah 'Keimi' a rawn lang. He film hi Christo Pa ziah leh direct a ni a, Dawm Pachuau ziah a awm tel bawk. Mizo film dangdai, traditional fiction behchhana siam niin,cinematographer hi Lalbiakthansanga (B Lego Pictures) a ni. December, 2023 chhunga film hralh chhuah hnem panga zingah hian Leitlang Pictures kutchhuak 'Ambush' bakah 'Val Senior' an la lang chhunzawm bawk a ni.

Top 10-ah hian December-a upload thar film panga - 'Nun hi Enge?', 'Tleitiri', 'Keimi', 'Tunge i hming?' leh 'Khuarkhurum' te an lang. Khuarkhurum hi December 29-a dah luh a nihchungin Top 10-ah a rawn lang pha nghal a ni.