Motley Crue-in hla thar tichhuak dawn

Motley Crue bassist Nikki Sixx chuan nakkumah an band-in hla thar an tichhuak dawn tih social media-ah a puang.

An guitarist Mick Mars thlaktu, John 5 hoin April thla aṭang khan studio lam an lo luhchilh tawh a, hei vang hian Crue-heads lam pawhin hla thar hi an lo beisei ru reng a ni. An singer Vince Neil pawhin hla pathum an record thu leh, heng zinga pakhat chu 'Dogs of War' a nih thute pawh a lo sawi lang tawh bawk.

Nikum October thla khan Mick Mars hian arthritis chi khat, ankylosing spondylitis a neih avangin Motley Crue zingah a tel theih tawh loh thu hi official-in a tichhuak a, mahse, a hnuah Mars hian band aṭang hian an ban niin a puh leh thung. Hemi hnu hian solo-in a kal zui a, single pahnih 'Loyal to the Lie' leh 'Right Side of Wrong' a tichhuak tawh a ni.