Lehkhabu bawm : 'Ka Lalpa Duhtak' tlangzarh a ni ta
John Zothansanga lehkhabu ziah "Ka Lalpa Duhtak" tih chu Rev. Dr. Ngurthanpara Sailo chuan Inrinni khan lei theih turin a tlangzarh a, Pathian hnena hlanna hun a nei nghal bawk.
Rev.Dr. Ngurthanpara Sailo chuan, "Lehkhabu ṭha tak, rinna kawnga min pui theitu, ṭhalai nun beidawngte kai harh theitu lehkhabu a ni a, he lehkhabu hian ṭhalai tam tak beidawngte hnenah beiseina thar a pek ka beisei," a ti.
'Ka Lalpa Duhtak'hi Darthlalang Publication kutchhuak niin, bung 29-ah thupui hrang hrang awmin ṭhen hran a ni a, chhiar ninawm hman lo vek a ni.
John-a hian lehkhabu pahnih a lo tichhuak tawh a, sapṭawngin 'Savun Hampuar - The Mizoram Football Story' chu kum 2017 khan a tichhuak a, Indian sports website lar Khel Now chuan, "Five Books that documented Indian football perfectly in 2017' a tih zingah a telh. Hemi hnu hian sports journalism khawvela a tawnhriat leh infiammite chanchin ngaihnawm ziahna 'Khelmual Khawvel' a lo tichhuak tawh bawk.
'Ka Lalpa Duhtak' hi Vanglaini Office, Zarkawt leh Mizoram UPC bookroom, Upper Khatlaah lei theih a ni a, online-a lei duh tan lehkhabuk leh fit_lehkhabudawr (9853747397/9436360899) ah te chah theih a ni a, phone number 9774773132-ah zuar chhawng duh tan ngaihven theih a ni bawk.
A chhung thu ṭhenkhat
~Ni khat kan vui liam a, pen khatin ka thihna tur chu ka hnaih hret a lo ni. Keini pawh hi engtikah emaw chuan, "Kumthar Chibai," tia kan lawm kumah ngei chuan vui liam kan la ni ve ang a, saruakin khawvel hi kan kalsan ang.
~Nilai zan inkhawm pawh pelh ngai lote khan eiruk kan ṭhulh phah lo a, mi rethei tana luangchhuak ṭhin mi hausate kha kan hausakna hnar erawh retheite chanai a ni lawi si. Sumah duh tawk kan nei lo. Ngah teh mah ila, neih belh zel kan duh a, neih belh kan duhnaah khua kan hmu hek lo.
~Khami nia a zirtirte tifuh inti hmel tur kha ka mitthla fo ṭhin - "En teh, kan zui fuhzia hi!" an inti ang a, "Len kha lo deng reng ta ila, eng ruai kan ni awm si lo," te an ti ang a, a ṭhen chuan rorelna dawhkana an chanvo tur thlengin an mitthla hial mai thei e!
~Khawiah nge hmangaihna, kan ti a, kan hmu lo. Ngilneihna pawh daifemah inthlahrung takin a awm a, rinawmna chuan khawhar takin in a nghak a. Mahni nawmsakna ṭheuh zawngin kan pen nasa em em. Thi leh mai tur kan ni tih kan hre reng si.
~"Ni tin kan ei khawpin chaw min pe ang che," tia kutsuih chunga ṭawngṭaite khan chuhhelh taka an ei khawp aia tam an ban duak duak lai ka hmu a, hmangaihna hi rinhlelh chang ka nei a nih pawhin min dem suh aw.
~Sipai za hotu Jaira fanu takte kha aw! Mi zawng zawngin a thi tawh a ni, an ti a. Mahse, kha hmeichhe pa Jaira khan nunna chunga thuneitu a dawr mek tih reng an hre lo. Krista khan, "Chemte tho rawh ka ti a che," tiin a hrilh a, Isua hmel hmutu naupang khan damna a lo chan takzia kha.