LAL KA NI

Tun hnaia Mizoram chhunga Hotel neitute leh Mizo nu pakhat inhmachhawn chungchang social media-a lo lang ka hriat rualin ka rilruah thil pakhat a lo lang nghal a, (he thil hi sawi zui lovin thil dang sawi daih ka tum a ni, chu chu– Pi Rajyalakhsmi Rao, Member, National Consumer Disputes Redressal Commission lehkhabu ziah 'Consumer is king' tih ka chhiara a lairil kha a ni.

Hotel leh Restarant siamtute mai ni lovin, mi zawng zawng hi thil leitu leh hmangtu (consumers) kan ni vek a, hotel neitute leh dawrkai-te pawh an service emaw thil zawrh emaw ni lo, dawr/service dang an va dawr/chakkhai an va lam khan consumer an ni nghal vek mai; sum leh pai hlawh chhuah nana mi dangte rawngbawlna chi 'services'reng rengah hian Zofate hi kan inenfiah fo a ngai hle; thil leitu leh hmangtu, sum senga thil ei/ei reng reng (customers) hi, a leitirtu/ei tur hluitute tan hian 'Lal' an ni vek tih chu he lehkhabu thuchah laimu a ni. Consumer protection act, 1986 (Its Rules 1987& Reg.2005)-in a hrilh tum pawh sumdawng va dawrtute, 'lal' an nihna hi a ni. Sum sen leh kan thil va lei emaw rawng min bawlsaktute service quality kha a inchawih mawi tawk/inhen tawk tur a ni, tihna a ni.

Hotel leh restaurant neitute thil ei/in chhawpte chu a dawrtute duhthusam a ni vek thei lo vang tih chu hriatsa a ni a, mahse, hawihhawmna chungchangah te, ei tur chhawp thianghlim chungchangahte, a thar (fresh) chhawp chungchangah te theih tawp chhuah a ngai a ni. Sumdawn, entir nan–hotel leh restaurant enkawl te hi thil namen a nih loh avangin Mizoram chhunga hotel/restaurant enkawltu member zingah hian Hotel/restaurant tinah kum 2/1 training chu sawi loh short term training, zo tawh leh internship pawh ti tawh te hi tel ve ngei thei vek se la duhthusam chu a ni tawh a ni. Training hun chhung rei deuh zawk duh Hotel Management course degree leh diploma, adt hi chu sawi thu a cheng lo va; A mi nawlpuiin awlsam taka an zawh mai theih short term course–hotel hospitality hi ṭhalaite hian tun ai hian bawh deuh se la a ṭha khawp mai; kan Mizo zia nen pawh a inmil.

India ramah pawh hotel hospitalities training-na hi hmun hrang hrangah a awm a, Mizoram aṭanga phai rama inhlawh zingah pawh hian (ka tawn hriat aṭangin) a hlawhtling ber chu hotel hospitality-a short/long term training neih hnua kan thawn thlak/chhuk thlakte hi an ni hial ang. Vai ramah chuan dawrkai/hotel neitu leh nghaktute hian anmahni dawrtute hi, 'Lal ka ni' ti vek hmuha an hmuh avangin an tan theih tawp an chhuah a, ṭhenkhat chuan complaint box te an hung a, chu chuan mikhualte tan lungawina a siam a, anmahni dawrtute a hip zui a, dawrtu an ngah zel a, an lo hlawk a, an lo hausakpui ta ṭhin niin a lang.

Kei pawh Aizawl aṭanga khawchhak lama kan zin ṭumin, chaw leh chawhmeh min chhawp chungchangah consumer ka nih angin, inthlahrung takin thil pakhat sawi ka nei ve a, chu chu lawm taka dawngsawng ta lo chuan, "Ei lo tawp la a ni mai a lawm," mi ti a, hmanhmawh deuh lo phei i la chuan, hotel-a chawl zelte tana mal sawmna ni turin kan inhnial zui deuh maithei.

Hotel-ah hian khualzin mi chi tinin an ei/in a, hei vang hian chaw/chawhmeh thar leh lum ṭha inhlui zat zat theih hi chu duhthusam a ni; sa chauh lo pawh, chaw eitute lamin an sawisel lem loh pawhin, chawhmeh ṭhing leh daite hi inchhawp loh hram ni se, kawchhung hian hetiang hi a kawm ngeih lua lem lo tihte hi hriat nawn thar fo a ṭha ang.

A tawp nana ka sawi duh chu, Sawrkar laipui aṭanga sum leh pai nena ṭang duna Hotel hospitality training-na hi Mizoramah hian a tam tawh hle a, hotute zara kan training chhuahtir Mizo nula/tlangval hi an ṭhahnem hle tawh a ni. Heng traing institution aṭanga zir chhuak, phai rama tawnhriat nei tawh, Covid leh chhan hrang hrang vanga lo hawte leh hna mumal la thawk hman lote hi Mizorama highway restautrant/hotel-ah te hian thawk awm vek tawh se, hotel leh restaurant neitute leh khual zinte tana hmasawnna nasa tak a ni ngei ang. Training leh a hnua tawnhriat neih hnua eizawnna (trade & job roles) hrang hrang hmanga mipui rawngbawltute quality leh, training nei lova inzir chawp chunga thawka mipui rawngbawltute thiamna/thawh dan (quality) hi a inthlau viau thei a ni.

Hmatiang sawnin Zofate i kal zel ang u.

- Dr J.T.Vanlalngheta