AP : Olympic gold medal late tan Rs. vbc 5 pek tiam

Arunachal Pradesh chief minister, Pema Khandu chuan Seijosa, Pakke Kessang district-a 11th greater Kameng Badminton championship 2023 hawnnaah thu sawiin, state sorkarin Arunachal Pradesh mi, Olympic games-a gold medal late lawmpuina pawisa pek tur a dah hran vek tawh thu a sawi.

Chief Minister chuan gold medal late chu Rs. vbc 5 pek an nih tur thu leh, silver medal late chu Rs. vbc 3 leh Bronze medal late chu Rs. vbc 2 pek an nih tur thu a tarlang.

CM chuan infiammite tana lawmpuina pawisa pek chu anmahni tihphurna atan leh, theihtawp chhuah tura nawrtu a nih an beisei thu sawiin, sorkar pawhin state mipuite tana infiamna lam chawi san zel a duh thu a sawi bawk. "Arunachal Pradesh hi ram chhunga infiammi ṭha awmna state angin kan lang ngai lo a, 2014 hma lam kha chuan India pawh hi infiamna lamah chuan khawvel huapa a hniam ber pawl a ni. Tun hnaia Olympic games emaw, Asian games emaw, Paralympics-a medal a dawnte en erawh chuan infiamna a ṭhang nasa tih a hriat. Hetiang chiah hian Arunachal Pradesh pawhin sulhnu ṭha a nei ṭan a, North East-ah Manipur leh Assam dawta infiammi ṭhatna hmun pathumna a ni tawh a ni," a ti.

Badminton cham­pionship hi Greater Kameng Badminton Association te'n kum tin an buatsaih ṭhin a ni a, undivided Kameng chhunga awm, Pakke Kessang, East Kameng, west Kameng leh Tawang district chhunga mipuite inpawhna atan leh infiamna rilru dik pu thei tura inzirtirna atana buatsaih an ni.

Khandu hian a pa, Dorjee Khandu pawhin badminton a ngainat thu leh, a pa hriatrengna atan leh badminton chawisan nan, Chimou, Itanagar-a Sangey Lhaden sports Academy bulah ram zau tak a pek thu a tarlang. Khandu chuan badminton academy din a nih tur thu leh, khawvel huap pawha hman tlak court pariat siam a nih tur thu tarlang bawkin, ram chhunga badminton intihsiakna chi hrang hrang pawh an thlen thuai theih a beisei thu a sawi bawk.