Miss Universe 2023 atan Miss Nicagarua thlang

Miss Nicagarua, Sheynnis Palacios chu 72nd Miss Universe atan thlan a ni. Miss Thailand Antonia Parshild chu first runner up niin, second runner up-ah Miss Australia Moraya Wilson thlan a ni.

72nd Miss Universe pageant finale hi San Salvador, El Savador-a Jose Adolfo Pineda Arena-ah an ram huna November 18 zan khan neih a ni. He intihsiaknaah hian ram 84 aiawhte an tel.

Kumina intihsiaknaah hian Pakistan chu a ṭum khatna atan a tel a, an ram aiawhtu Erica Robin chuan semi-final round a thleng. Miss Portugal leh Miss Netherlands-te chu pageant-a transgender tel hmasa ber an ni a, Columbia aiawhtu Camila Avella chu nu ni tawhin, Top 10 a tling bawk. Miss Nepal chu plus-size niin, eng ang pianhmang pawh a mawi vek a ni tih a lantir dawn tih a lo sawi tawh a, lawm a hlawh hle. Miss China erawh visa a fel hman loh avangin a tel thei ta lo a, nakkuma intihsiaknaah an ram aiawh hian a tel ang.

Miss Universe 2023 atana thlan, Shyennis Palacios hi kum 23 mi niin, Nicagarua-in Miss Universe title an lakna hmasa ber a ni. Final-ah zawhna, 'Ni khat atan hmeichhe dang angin nung dawn se, tunge a thlan ang leh eng nge a chhan' tih chu Palacios hian 19th century British philoshopher leh feminist Mary Wollstonecraft a thlan tur thu sawiin, ani hi indaidanna ṭhiahttu leh hmeichhe tam tak tana kawng hawnsaktu a ni tih a sawi.