Lehkhabu bawm : CL Ruala lehkhabu 'Kan Sulhnu' tlangzarh

Mizo politician senior berte zinga mi, CL Ruala (87) autobiography, 'Kan Sulhnu' chu nimin khan Rev C. Vanlalhruaia'n Aijal Club-ah a tlangzarh.

'Kan Sulhnu' tlangzarh inkhawm hi Upa Peter Zohmingthanga, Chanmari-in a kaihruai a, Vanneihtluanga, Editor, Lengzem chuan lehkhabu thlirlawkna hun a hmang.

Ex-EM, Ex-Minister (term 3 pum hlum leh Interim Sorkar), Ex-MP (Lok Sabha) (term hnih) CL Ruala hian a lehkhabuah hian Mizoram politics-a a sulhnu a ziak tam ber a, an chhungkaw chanchin tlem leh a hobby, thlai chin leh enkawl dan ṭhenkhat a ziak bawk. Mizoramah remna leh muanna a thlen theih nana amah leh Congress party-in an hmalakna te, Mizo Union leh MNF te nena an thawhhona te a tarlang. Hei bakah hian Power & Electricity lama Mizoram hmasawnna tura ministry hrang hrangin an hmalaknate leh Congress party-in Tuirial Hydro-Electric Project atana an hmalakna a tarlang bawk. He lehkhabu hi phek 266-a chhah niin, bung 36 a awm a, Rs 350 man a ni.