Bayern chakpuitu Kane

Bayern Munich-in Harry Kane an nei a, Champions League group A-ah German champion hian match liah chak vekin knockout stage an lut. Nilaini zan Allianz Arena-ah Bavarians hian Galatasaray an mikhual a, England captain Kane-a goal hnih hmangin mikhual Galatasaray 2-1 in an hneh.

Bayern leh Galatsaray inkhel a nung a, goal lut har mah se goal chance a tam. Kane pawhin goal ban a tihper a, Galatasaray midfielder Lucas Torreira pawhin Mauro Icardi siam chu goal-ah chantir mah se Argentine forward hi a offside vangin pawm a ni lo.

Mamawh hunah tak Kane a rawn inlar a, minute 80-naah Joshua Kimmich freekick chu a tauh goal. Assistant referee-in offside flag a phar avangin VAR hmanga ennawn a ni a, Kane goal hi pawm a ni ta tho. Minute 86-naah Mathys Tel siam chu Kane hian goal ruakah a khung leh bawk.

Bayern-in khung belhna remchang an nei a, Thomas Muller-a'n goal pawnah chiah a pet. Galatasaray-in Cedric Bakambu hmangin si phurh an sut ṭhen a, Turkish club-in Kim Min-jae leh Dayot Upamecano te inkawpna Bayern tlarhnung an ṭhiat awlsam mah mah.

Bavarians-in tlarhnung tihphui an mamawh a, chutihrualin Kane khelh danah erawh an lawm ang. English striker hian UCL match li aṭangin goal li a khung a, tun season bikah match 15 aṭangin goal 19 a khung a, assist vawi sarih nen phei chuan vawi 26 tehmeuh goal-ah a inrawlh tihna a ni.