Vanglaini - Tanhaji: The Unsung Warrior a hlawhtling

KHAWTHLIR

JNU beih duh lohna MZU-ah lantir dawn

Mizoram University Teachers' Association (MIZUTA)chuan vawiin hian MZU Park-ah 'Peaceful demonstration against JNU attack' an huaihawt dawn a, January 5, 2020-a misual rualin Jawaharlal Nehru University (JNU), New Delhi an beih duh lohna lantirin zirtirtu leh zirlaite an pung khawm dawn. He hunah hian pawl panga - MIZUTA, MUNTSA, MZU Students' Council, MZU Alumni leh JNU Alumni aiawhte'n thu an sawi ang.

Thisen pe

Mizoram police-a CID (Special Branch) leh CID (Crime) chuan Mizoram police din champha pualin nimin khan blood donation camp an huaihawt a, Aizawl Civil Hospital tan mipa 37 leh hmeichhia pakhatte'n thisen unit 38 an pe. Serchhip Chanmari Vengthar Branch KṬP pawhin nimin khan Serchhip District Hospital tan thisen unit 11 an pe a, a petute hmeichhia paruk leh mipa panga an ni.

CAB/CAA tihnêp Tumnaah ngai

MPC party ṭhalai chuan thuchhuah siamin, Zoramthanga kaihhruai Mizoram sorkarin zu zawrh chungchang an vawrh chhuak chu Citizenship Amendment Bill (CAB) boruak tihdahlauna hmanrua atana an tih nia an ngaih thu an tarlang a, "CAA laka mipui rilru hruai kâwi an tumna mai a nihzia a tilang chiang hleah kan ngai a, ṭul miah loa mipui rilru tichî-âi zawnga hmalakna sim tawh turin Pu Zoramthanga kan beisei," an ti.

Joint CEO thar

Mizoram sorkar chuan Printing & Stationery controller David Liansanglura Pachuau chu joint chief electoral officer (Joint CEO) atan a ruat a; Printing & Stationery controller atan hian Angela Zothangpuii a ruat nghal. Officer pahnih sîksawina thupek hi nimin khan tihchhuah a ni.

Minister-in enfiah

Champhai Zotlang khaw hmun hluia Botanical Garden siamna tura ruahman chu nimin khan Environment Forest and Climate Change minister TJ Lalnuntluanga'n a enfiah. Botanical Garden hi Mizoram chhunga thing leh mau awmte humhalh a, awlsam taka hmuh mai theih tura phochhuahna hmun tur a ni a, mipui vantlang tana lenkhawthawnna leh zirna pui theitu tura ruahman a ni.

DAWNTISEI

Tanhaji: The Unsung Warrior a hlawhtling

Ajay Devgan film Tanhaji: The Unsung Warrior a hlawhtling hle a, tlangzarh a nih niah ringawt pawh cheng vaibelchhe 15.10 a tling.

Inrinni khan cheng vaibelchhe 20 a lalut thei a, ni hnih chhunga a sum lakluh hi Rs vbc 35 chuang zet a tling a ni.

A khingpui ber tura ngai Deepika Padukone channa Chhapaak chuan ni hnih chhungin Rs vbc 10 a lalut a, hei pawh hi hlawhthling thawkhata ngaih a nih laiin Tanhaji: The Unsung Warrior hlawhtlinna hi chu a thuah hnih hle.

He film hi Om Raut direct a ni a, Ajay Devgan, Kajol, Saif Ali Khan, Sharad Kelkar, Luke Kenny, Shashank Shende, Devdutt Nage leh Neha Sharma-te chu changin January 10 khan tlangzarh a ni. Thawhṭanni thleng khan Rs vbc 61.75 a lalut tawh bawk.

Share this Post

Login to comment

No Comments