Man United an chak lo leh tawh! An hneh loh chu Copenhagen

Manchester United-in team naran pawh an el tawk zel a, kartawp inkhela Fulham an hneh ṭawk hnuah Champions League inkhelah an tlawm. Erik Ten Hag-a hote hian Parken Stadium an tlawh a, mualneitu Copenhagen lakah 4-3 in an chak lo.

UCL match li khelh tawh aṭangin Man United hian point thum an hmu a, table mawngphaha an awm avangin an dinhmun a ṭha lo. Chutihrualin an elpui Copenhagen leh Galatasary ten point li ve ve chauh an hmuh avangin knockout stage luh beiseina an nei thung.

UCL atana duan Hojlund

Man United striker thar Rasmus Hojlund-a'n Premier League-ah goal a la khung lo a, UCL-ah erawh a ke a hmui hle. Danish striker Hojlund hian minute thumna lekah Scott McTominay cross a pet goal.

Minute 28-naah United-in counter attack hmangin Copenhagen an vaw let a, Bruno Fernandes-a'n la pheiin, a ball pek chu Alejandro Garnacho-a'n goal-ah a pet. Keeper Kamil Grabara-a'n dang mah se a per chu Hojlund-a'n a tilut a, Danish forward hian match li lek aṭangin UCL-ah goal nga a khung tawh!

Hojlund hian hattrick siamna remchang a nei a, goal-ah ṭha takin pet mah se keeper Grabara-a'n a dansak. United an khel ṭha a, mahse darkar chanve hnu lamah beisei an pha lo.

Red Card leh tlarhnung pawp

Marcus Rashford-a'n tlarhnung a pui a, an box bulah ball changin a ball chan chu hum tumin a ke a kar a, mahse a ke dahna turah Elias Jelert-a'n a ke a dah hman avangin Copenhagen left back hi a tlawh.

VAR hmangin ennawn a ni a, Rashford-a vanduai - referee-in minute 42-naah red card a pe. Freekick aṭanga ball kal hi Fernandes-a'n tauh fuhin crossbar a per a, Copenhagen tiphurtu a ni.

Mohamed Elyounoussi-a'n minute 44-naah si phurh a sut ṭhen a, Man United an buai zui hle. Inkhelh ṭantirh lamah Jonny Evans a inhliam avangin Raphael Varane-a'n a thlak a, hemi ṭuma an inenkawl rei avang hian minute 13 tehmeuh hun pek belh a ni. Copenhagen-in injury time hmang ṭhain Diogo Gonclaves-a'n hun pek belh minute kuanaah penalty aṭangin si phurh a sut a, ball-in Harry Maguire-a kut a per avangin penalty hi an hmu.

Insiamṭhatna tluan tling lo

Man United tana penalty chawitu Maguire-a'n penalty a hlawh chhuak leh thung a, English defender hian Lukas Lerager kut a tauh per. Bruno Fernandes-a'n minute 69-naah hmahruaina goal a khung a, United an insiamṭhaah ngaih theih mah se a tluan tling lo.

Copenhagen-in an tam zawk tih an hria a, point hmuh tumin huai takin an nawr. Man United-in goal venhim tumin tlarhnungah an inhnawh hnem a, heti chung hian a phui tawk lo. Diogo Dalot-a'n a player ven a chhuah avangin Lerager-a'n minute 83-naah si phurh sutna goal a khung. Penalty chawitu Lerager-a'n goal a khung leh tak avangin team angin an phur ta sawt.

Mualneitu goal bawh a na a, United an buai tulh tulh. Mual vei lama awm Dalot-a'n awmna tur a hre tawh lo a, United defender tih ṭhat tawk loh hi Roony Bardhji-a'n hmang ṭangkaiin minute 87-naah chakna goal a khung. Hun tawp lamah United-in si phurh sut tumin nawr leh mah se goal dang hmuh tur a awm tawh lo.

Inkhel result thlak danglamtu VAR

Europe-a inelna lian thamah VAR hman a ni vek tawh a, tun hnaiah sawisel a hlawh nasa hle. Premier League-a Arsenal-in Newcastle an hneh loh chhanah VAR an mawhpuh a, Mikel Arteta ngaihdan thlawptu an ṭhahnem.

Man United manager Erik Ten Hag pawhin Marcus Rashford-a red card hmuh chu an chak loh chhan a nih thu a sawi bawk. Club legend Paul Scholes chuan, "Inkhelh kal laia en kha chuan red card chu a ni lo. Rashford thil tum kha a chiang a, tihpalh vangin a rap," tiin a sawi.

Mahse, referee Donatas Rumsas-a'n mual sira thil thlen dan 'slow motion' a en leh meuh chuan a lan dan a dang tawh. Rashford-a'n Elias Jelert ke a tlawh ngei si - red card a pe.

Ten Hag chuan, "Thutlukna pawm harsa tak a ni a, red card hnuah inkhel a danglam. Rashford khan ball hum a tum a, referee pawh khan thutlukna siam a harsat," tiin a sawi.

United midfielder hlui Owen Hargreaves pawhin, "Vawi maktaduai khat pawh thleng nawn se, red card a ni lo. Ball ven a tum a, foul satliah a ni," tiin a sawi ve bawk.

Erik Ten Hag-a hoten insiamṭhat an mamawh a; November 11, Inrinni zanah Luton Town an hmachhawn ang a, an chak zo lo a nih ngat chuan Dutch manager hi an ban tawh hial ang.