Chief Minister-in lawmthu a sawi

Chief minister leh MNF president Zoramthanga chuan Mizoram inthlanpui neih tak chungchangah lawmthu sawina a tichhuak a; ECI inkaihhruaina, Supreme Court thupek leh dan hrang hrangte ṭha taka zawm a nih avangin inthlanna hlawhtling tak neih theih a nih thu a tarlang.

Zoramthanga chuan, inthlan­puiah vote thlak tura inzirtirna nasa taka kalpui a nih thu sawiin, "ECI duan inkaihhruaina te, Supreme Court thupek leh dan hrang hrangte ṭha taka kan zawm tlân avangin inthlanna muanawm leh hlawhtling tak kan nei thei a, vote thlaktu pawh kan tamin, ram puma vote tla zat (poll day) hi 80.43% a tling a ni," a ti.

MNF President chuan, "India rama state ralmuang ber Mizoramah democracy rama inthlanna awm tawhah chuan muanawm leh felfai ber, ram dangte entawn tlaka inthlanna buatsaih a ni leh thei hi dan zawm kawnga ram mipui ṭanrualna leh inpumkhatna ṭhat vang a ni," a ti a; ECI press note-ah pawh mipuiin phûr leh hlim takin Democracy Kûtpui Mizoramin an hman thu tarlan a nih thu a sawi.

Inthlanna buatsaihtute leh buaipuitute, venhimna lam buaipuitute chungah a lawm thu sawiin Zorama chuan, "Mizoram People Forum leh political party-te thawhhona thuthlung angin inthlanna zalen, thianghlim, dik leh felfai a awm ngei theihna tur leh sorkar inrèlbàwlna ṭha a awm theihna tura hmalakna pawh a hlawhtlinna kan hmu zel a, MPF chungah lawmthu kan sawi a ni," a ti.

Zoramthanga chuan, roreltu thlang tura khua leh tui ṭha mawhphurhna hlentu ram mipui chungah lawmthu a sawi a; a bikin kum upa, mahni in leh vote thlakna hmuna vote thlak tura pên chhuakte chungah a lawm thu a tarlang.

Media hrang hranga thawk­tute'n inthlan chunchangah an thawh hlâwk hle tih sawiin Zorama chuan, "An inpekna leh thawhrimna avangin an chungah lawmthu kan sawi a ni," a ti a; Pathian hruaina zawng zawng avangin lawmthu a sawi.

MNF President chuan, MNF party General Headquarters aṭanga block leh unit zawng zawng, MNF Election Campaign Directorate leh MNF sorkar a din leh theihna tura theihtawp chhuahtu leh MNF thláwptu zawng zawng chungah lawmthu a sawi a, "MNF chuan Mizoramah inthlanna zalen, thianghlim, dik leh felfai a awm theih nan leh ram rorelna ṭha a awm theih nan theihtawp chhuah zel a tum a, Mizoramah hmasawnna nasa zawk thlentir tur leh kan ram leh hnam, sakhua humhim turin theihtawp chhuah zel a tum bawk a ni," a ti.