Khiangte Construction Ṭhazual Lengzem : Mary Dawngi 'Aw Bawihte' in hma a hruai

Khiangte Construction Ṭhazual Lengzem-ah Mary Dawngi chuan, 'Aw Bawihte' tiin hma a rawn hruai ta e.

Mary Dawngi hian 'Aw Bawihte' hi September 27 khan YouTube-ah a dah chhuak a, he hla hi Zira Sailo phuah niin, music leh mixing hi Khai Pii kutchhuak a ni thung. A zaithiam piah lamah, a music video pawh en a nuam hle a, lamthiam tak takte'n an rawn pui. An choreographer hi Khawm Lun a ni a, videographer Horizon leh, director Mario Pui an ni.

Chuai thei lo, Michelle Varte pawhin hma a rawn sawn zel a, 'Ka chanpual' tih chu pahnihnaah a rawn lanpui ta. A music video pawh a hmuhnawm lehpek hle. Siamsiami 'Senhri par' chu pathumnaah awmin, Mizo Idol 2022 Hmangaihi hla thar, 'Mangṭha mai le' tih chu palinaah a rawn chho ta bawk. Puipuia Chhakchhuak chuan 'Damlai hringnun' hmangin Top 5 a rawn khar.

HT Lalthanzami 'Hero', Zadinga ft. Johny 'Duhaisam' leh Asanga Project ft. Ruth Tochhawng & Fawni Ralte 'An Iang zo lo' te pawh chart-ah lang chhunzawmin hma an sawn chho zel. Anni bakah Top 10-ah hian Marshall Fka Fanai leh Apuii Chhangte an rawn lang thar bawk a ni.