NE Games football final-ah Mizoram Vs Nagaland

Tukin zing dar 7:30 hian Mizoram leh Nagaland ten Imphal, Manipur-ah North East Games football final an khel dawn. Mizoram hian final lut turin Tripura an hneh a, Nagaland hian Manipur an hneh thung.

Inrinnia semifinal khelhah Mizo-ramin Tripura lakah goal chhuah hmasa mah se second half-ah Lalhlimpuia, Lalruatfela Zote leh Lalbiakhlua (Hlutea) te goal hmangin an lehthal a, 3-1 in an chak. Mizoram hian group stage-ah Lalmuanawma goal hnih bakah Lalhlima leh Lalchhanhima (Tetepuia) te goal hmangin Arunachal Pradesh 4-0 in an hneh a, Manipur nen goal awm loin an inhnehtawk bawk.

Mizoram hmachhawn tur Nagaland hian Manipur 3-2 in an hneh a, final-ah hrem vangin Fela Zote a inlan thei dawn lo a, inhliam vangin Lalhlima leh Lalhmunmawia (Ahmuna) te dinhmun a chian loh avangin Mizoram hi chak chiang an ni bik lo.

Mizoram coach Lalsangzuala Hmar chuan, "Semifinal-ah kan khel ṭha lo a, group stage aiin kan khel ṭha lo zawk. Ei leh inah lamah harsatna kan tawk a, Mizoram nena kan ei hunbi a inan loh avangin player-te an chak ṭha tawk lo. Amaherawhchu final-ah hian chhuanlam neih kan tum lo a, Mizoram tan gold medal lak ngei kan tum," tiin Vanglaini palai a hrilh.