Semifinal-ah Mizoram hnehtu Maharashtra

Santosh Trophy vawi 70-naah Mizoramin nimin khan Maharashtra goal khatin an hneh lo a, inkhel danga Services-in Railways 2-1 a an hneh ve bawk avangin inelna thlengtu Maharashtra-in semifinal an lut.

Mizoramin semifinal thleng turin vanneihna an mamawh tawh a, Services-in point an hloh chauhin a sang pali zingah an inhlangkai tawh ang.

Red card - 1

Mizoram tan chak ngei ngei a ngai a, Maharashtra lamin an mualah point thum an hlawhchhuah an tum bawk. Goal khung tuma an innawr tawn avangin inkhel a hmuhnawm a, chungnung zawk an awm lo.

Mizoramin chance ṭha vawi li an nei a, R. Laldanmawia'n minute 17-naah crossbar a tauh per a, Malsawmfela ball pet chu a hlauhawm hmain defender-in a dan sak bawk.

Mizoram tan MS Dawngliana a khel ṭha a, Bawngkawn tlangval Dawngtea goal khung tur chu keeper Owais Khan-a'n a dan sak. First half tawp hmain Danmawia leh Sawmfela chauhin keeper an hmachhawn a, Sialhawk tlangval ball pet hi Owais Khan-a'n penalty area pawnah a kuta a dan avangin hnawhchhuah a ni.

Maharashtra keeper hnawhchhuah hnuah first half a tawp nghal a, mualneitu lam hian Mizoram chance neih ang zat zet an nei a, keeper Vanlalhriata tana dan harsa tur erawh a awm lo.

Mizoram manager T. Vanlalhluna chuan, "Chhuanlam tur kan nei lo a, player 10-a an khelh hnuah goal venghim tura player an inhnawh khawm avangin goal khungna chance ṭha kan nei lo. Tunah hian kan la tla lo a, eng result pawh thleng se kan match tawp ber thlengin theihtawp kan chhuah ang," tiin Vanglaini palai a hrilh.

Goal khat

Mizoramin chak an mamawh a, player 10-a khel Maharashtra-in defensive game an khel thung.

First half-a goal khungna tur chance nei ṭha Mizoramin mualneitu lam tlarhnung an su pawp thei lo a, Maharashtra-in freekick aṭangin minute 55-naah inkhela goal awmchhun an khung.

Mizoramin match hnih khelh aṭanga point khat lek an hlawhchhuah avangin semifinal lut turin chak vek bakah vanneihna an mamawh a, Maharashtra erawhin semifinal an lut chiang thung.

Engtin zel...

Mizoram hian Jammu & Kashmir leh Services an hmachhawn dawn a, heng inkhelahte hian an chak ngei ngei a ngai tawh.

Mizoram hian an khelh hmabak pahnihah point ruk pawh hmu se Services-in Maharashtra an hneh chuan an tla tho ang.

Vawiin hian Group B team-te an inlan dawn. Point ruk hmu tawh Goa leh Tamil Nadu an inhmachhawn ang a, chak la nei lo pahnih Punjab leh Assam te an inkhel bawk ang.