Jennifer Garner A nun thlak danglamin a awm

Alias te, 13 Going on 30 te leh Daredevil-ah te hlawhtling takin a chang a, mahse Jennifer Garner nun thlak danglam tak taktu chu Miracles From Heaven film, tih-chhuah mai tur hi a ni.

Actress hlawhtling zinga mi Jennifer Garner hian Pathianni kaltaa a inkhawmnaah Bishop TD Jakes a kawm a, hetah hian a nun thlak danglam a nih dan a sawi.

Miracles From Heaven film chung-chang a sawi chhuak a, "He film hi a ṭhen lai chauh pawh ka en hlei thei lo, ka en chuan ka ṭap lo thei lo ṭhin a ni," a ti. He film-a character lang chungchang sawiin, "He chhungkua hi ka ngaina nghal tawh a, an chhungkaw inhmangaih tawn dan chuan nasa takin min hneh a, an rinna ngheh leh ṭhatzia hian ka thinlung a khawih a ni. He film-a he hmeichhe lema ka chang hian tawnhriat ropui, ka nun thlah danglamtir thei khawp min pe a, ka nunah chakna nasa tak mai min pe a ni," a ti.

Miracles From Heaven hi kumina tihchhuah tur, Kristian film a ni a, hetah hian Jennifer Garner chu Anna nu, Christy Beam lemah a chang. Christy Beam chanchin behchhana siam a ni a, Christy Beam hian fanu Anna a nei a, Anna hi a chaw kawng lama harsatna avangin thi mai tura ngaih a ni tawh a, chuta ṭanga a lo dam leh chanchin a ni. March 16 hian theatre-ah chhuah ṭan a ni ang.

Garner hian Los Angeles-a a awm hnuah sakhuana leh rinna lam chungchang a sawi ngai tawh lo a, a chhan chu Los Angeles-ah chuan sakhuana lam emaw, mahni rinna puan chhuah a, sawi chhuah chhen hi politics kaihhnawiha an ngaih avangin miin an duh lo a ni. "West Virginia-a kan awm lai chuan ka inkhawm fo ṭhin a, mahse Los Angeles-a ka awm hnu hi chuan ka inkhawm ngai ta lo. He movie chungchang hi ka fate ka hrilh chuan 'Anu, biak inah min hruai ngai miah lo' an ti a, tichuan Pathianniah kan inkhawm ṭan ta a ni. Miracles From Heaven avang hian Jennifer Garner chuan biak in a thlen leh phah a, a rinna pawh tuaitharin a awm a ni.