NETFLIX: US-ah Pokémon: Mewtwo Strikes Back Evolution an en nasa

Netflix chuan kar Zirtawpni liam ta khan United States-a an anime viewership chu 100% zetin kumin chhung hian a pung tih an tarlang a, Pokémon: Mewtwo Strikes Back Evolution chu kumin chhunga anime title film an en nasat ber a ni tih an tarlang tel bawk.

Pokémon: Mewtwo Strikes Back Evolution hi kumin February 27 khan Netflix chuan en theih turin a chhawp chhuak a, Pokémon Day niah tak an tlangzarh a ni. Pokemon game hmasa ber Pokémon Red leh Pokémon Green Japan-ah February 27, 1996 khan tlangzarh a ni.

Pokemon: The First Movie remake Mewtwo Strikes Back Evolution hi 3D CG-a siam niin Pokemon movie hmasa ber nen khan a plot a danglam lo a, hetichung hian miin hmuhnawm an la ti hle tho tih a chiang.

Netflix India pawhin India ramah pawh Mewtwo Strikes Back Evolution hi anime title en nasat ber a ni tih sawiin, Netflix India vice president Monika Shergil chuan Asia ramah pawh a letin kumin chhung hian Anime entu an pung tih a sawi.