Kolasib district dinhmun

Mizoram DGP chuan tun hnai khan Kolasib district chhunga police station hrang hrangte a tlawh a, Kolasib-a thuthar thehdarhtute'n an lo kâwm bawk a. An district chu ramri buai nei ṭhin an nih vang te, ṭhenawm state aṭangin ruihhlo lak luh a awl sam vangte leh state páwna ruihhlo tlân ṭhinte kalkawng a nih avangin an district-a police station-te chu thuam
ṭha a, thawktute pawh dah belh a nih theihna tura hmalakpui turin an ngen.

Kolasib district hi Mizoram chhuah kâ an ni a, hei vang hian hamṭhatna tam tak an neih rualin district dangte buaina tawh ve loh buaina lian tak tak an nei bawk. Kolasib-a thuthar thehdarhtute'n DGP an lo hrilh ang hian an district hi a awmnain a zir avangin harsatna tam tak an nei a, thuam uluk an ngai khawp mai.

Chutihlaiin district tin hian pawimawmna bik hi an nei ṭheuh a, district dangte hian midangte tawh loh harsatna pawh an tawk vek bawk. Ramria awm district dang an awm a, an district chiahin harsatna an tawh bikte pawh sawi tur an nei ngei ang a; nimahsela Kolasib district-in harsatna an tawh ṭhinte hi ram pum nghawng thei thil a nih vangin thuneitu lam tan chuan ṭanlak theih a ṭha khawp mai.

Vairengte-a sorkar department hrang hrang check gate siam dan leh a taka an kalpui dante pawh hi chiang zawka vil a ṭha a, a police check gate ngeite thleng hian en ngun deuh chu a ṭhat hmel. Assam lam nen a khat tawka ramri-ah boruak nei hat ṭhin an nih avang pawh hian ramri leh a chhehvela police hmunte pawh thuam ṭhat a ṭul ang a, ruihhlo tawlh luhna a ni tih hre chunga police lam pawh an
ṭan zual a ṭha hle.

Kan awmna hmun azirin midangte aia kan chung-nun bikna leh midang tawh loh harsatna kan tawh chang a awm ṭhin a, Kolasib lamin an harsatna police hotu lu hnena an au chhuahpui hi thuneitu lamin ngaihthah lo se, ram pum nghawng thil buaina vawi tam tak a thlen tawh ṭhinna hmun a nih vangin a theih chin china thuam ṭhat an mamawh khawp mai.