US-in Myanmar-a Rakhine state ṭanpui dawn
United States Agency for International Development (USAID) chuan Myanmar khawthlang lam, Rakhine state-a tual-chhung buaina thleng avanga dinhmun rethei taka awm mekte chhawmdawlna turin US dollar maktaduai 5 a pe dawn.
Yangon-a US embassy chuan Rakhine state mipuite ṭanpuina pek tur thu hi thu-chhuah siamin a tarlang. Chhawmdawlna pek tur hi chhungkaw 9,000, mi 45,000 velin an chhawr thei dawn niin a sawi.
US embassy chuan Rakhine state mipuite harsatna tawh mek sutkian dan leh, chhawmdawlna pek an nih theih dan ngaihtuahin pawl hrang hrangte an thawhpui mek tih a sawi.
UN Office for the Coordination of Humanitarian Affairs (OCHA) chuan Rakhine state-ah hian kum thum kalta ṭanga chi leh chi inkara buaina a chhuah reng vangin mi 416,000 vel chu chhawmdawl ngaiin an awm niin a tarlang. Tualchhung buaina thleng ṭhin avang hian mi 1,40,000 vel chu camp-ah leh hmun dang remchangahte an khawsa mek a ni. Heng mite hian damdawi lama inenkawlna ṭha an dawn theih loh bakah, an khawsak pawh a harsa hle a ni, ati.