Hmarchhak mite tan Special Cell din dawn

Sorkar laipui chuan India ram chhung hmun hrang hranga hmarchhak miten beih an tawh ṭhin ven nan khawpui lian zualah special security cell din a tum. He thil hi MP Bezbaruah Committee in rawtna a thlen bawhzuina hmasaber a ni.

Special cell hi Delhi ah chuan din a ni tawh a, sorkar laipui chuan khawpui lian zual zawk hmun dangah hmarchhak mite tan security cell hran hi din a tum. Khawpui zawng zawnga din erawh a harsa dawn a, hmarchhak zirlaite bitna hmun khawpuiah chauh siam tum a ni.

Inhriatthiam lohna leh nunphung inmanlohna hi innghirngho a thlen fo a, kum 2012 -a Assam rama intualvuakna thleng nghawng zelah thu lengvak tam lutuk avang-in India rama khawpui hrang hrang aṭangin hmarchhak mite an chhuah phah nasa hle tawh bawk.Ṭawng in hriattawn lohna hi buaina thlen chhan ber pakhat nia sawiin, heng harsatna te tireh tur hian sorkar laipui chuan zirlaibuah hmarchhak chanchin leh a mi chengte chanchin telh a tum.

MP Bezbaruah Committee chuan hmarchhak zirlaiten India ram chhung hmun hrang hranga beih an tawh ṭhin tihreh anih theih nan rawtna tam tak a siam. Rawtna zinga langsar tak pakhat chu internet hmanga inthlunzawmna ṭha siam , hmarchhak mite hman ziarang lantir thei, lam leh zai te India ram zau zawka phochhuah a nih theih nan PPP mode hman te, hnam ang zawnga inbeihna a thlen changin rilru lama buaina neite pan tur Trauma and Counselling Centres din te a tel. Special Cell hi hmarchhak lam mi buaina tawkten an biak pawh ber tura din a ni.

Committee in a rawt zinga pakhat leh chu, hmarchhak zirlai phai lama lut tharte tan training buatsaih a, Hindi leh tualchhung ṭawng zirtir phawt a ṭul thu an tarlang.