"YouTube channel-te ka siam ve a, Pathianin ka phak vetawka ka hman thiam turin thiamna min pe a, heng aṭangte hian sum ka lalut ve a, Pathian hnenah pawh lawmthu ka sawi ṭhin. Chutihlai chuan ka Mizo ṭhalaipuite ngei maiin social media-a ṭawngkam bawlhhlawh leh uchuak taka min han beite hi a chang chuan rilru a na duh a, chutih rualin anmahni lam hi an khawngaihthlak ka ti," tiin Mizo zaithiam lar Vanlalsailova chuan social media chungchanga a ngaihdan a sawi.

Social media hi?

Vanglaini zawhna chhangin Sailova chuan, "Social media hi ka hmang nasa ve hle. Facebook, Instagram leh YouTube-te hi ka khawih nasa a, a hlu thei ang bera hman hi ka tum dan a ni. Pathianin mal min sawm a, YouTube-te hi ka sum lakluhna a ni ve der tawh. Ka Mizo ṭhalaipuite pawhin an hmang ṭangkai chho mek a, chutihlaiin chhiatpui khawpa social media hmang an awm hi a pawi ka ti," a ti.

Social media ṭangkaina sawiin, "Thil ṭangkai tak a ni a, information kan hriat zung zungna a ni a, mi ningkhawng kan hriat theihna a ni bawk a, rualpawlna ṭha tak pawh a ni. Social media kaltlang hian mi tam tak kan fuihin kan ṭanpui thei a, kan thu ziak emaw, kan thlalak emaw, kan video upload kal tlangte hian midangte beiseina petu, chakna siam thartu pawh kan ni thei," a ti.

Hman sual a awm thei

Sailova hian tunlai Mizo ṭha­lai zinga social media hmang thiam lo, mi beihna leh mi sawiselna atana hmang a, hun tam tak khawhralte a vei hle tih sawiin, "Miin hlawkna atana an hman tawh laia kan rilru chhungril khakna zawng zawng leih buakna hmun emaw tih tura an han hmang mai hi a mak ka ti. Mi beihna tur ringawta fake account siam a, midangte anchhe lawh duhna an nei ta mai hi a zia lo takzet a ni," tiin a sawi.

Hetiang mite hi social media kaltlang veka siam ṭhat an harsa tih sawiin Sailova chuan, "An 

ṭawngkam mawi lote leh an chet dan ṭha lote hi social media kaltlang veka siam ṭhat tum tur chi an ni lo. Keini aiin an huaisar a, ṭawngkam an insum lo a, na tak takin min bei let zawk a, an zak si lo a, fimkhur a ngai khawp mai," tiin tunlai ṭhalai ṭhenkhatte chet dan a vei thu a sawi.

Chhungkua a pawimawh

A vanglaia lengzem hla sa thiam bera chhal ngam, Pathian hla a sak hnua tuna Pathian thu sawitu ni zui ta chuan, "Social media hman dan inzirtirna hi tunah chuan chhungkuaah kan lakluh a ngai. Naupang hian kum 10 an tlin chuan hetiang chungchanga zirtirna hi dawng tawh rawh se," a ti.

Chhungkuaa zirtirna dawng lote an veiawm tih sawiin, "Social media-a hram tlahawlh tak takte hi rilru hrisel lo pu an ni a, chhungkuaah an inzirtir lo a nih hmel. Mahni chhung­kua timualpho a, mahni inti thangtlawm duh tur khawpa social media-a an awm duh hi chu chhungkuaa kan inzirtir loh vang a ni ngei ang," tiin a sawi.

Vanlalsailova hian tun hnaiah Guwahati-ah rawngbawlna a nei zo chiah a, vawiin aṭangin Pune Mizo Christian Fellowship lamah rawngbawlna a chhunzawm ang a, October 29-ah Aizawlah a lo kir leh ang.

Vanlalsailova

Instagram - 

vanlalsailova_official3 - 35.1k follower

Facebook Page - 

Vanlalsailova - Gospel Singer - 11k likers

YouTube - 

Vanlalsailova Official - 140k subscribers

Share this Post