Ruihhlo do

YMA Central Executive Committee chuan ruihhlo dotu pawl Supply Reduction Service (SRS) kalpui zel an rel. SRS hnathawh hun chhung tura ruahmanna awm hmasa chu tunah hian a tawp tawh a, ramin a la mamawh nia hriain SRS kalpui zel hi CYMA hian an rel ta a ni.

Mizoramah tun hnaiah ruihhlo a hluar thar hle niin an sawi a, mi ṭhenkhat chuan zu zawrh a nih tak avang hian ruihhlo zuarte hi an ngampa sawt niin an sawi. Sorkarin dan angin zu a zawrh hnua ruihhlo a hluar ta a nih chuan sorkar mualphona lian tak a tling a, zu a zawrh hmaa khuahkhirhna hnuaia zu zawrh theih inring sorkar hian zu a zawrh tak hnuah hian ruihhlo lam hi a hlamchhiah thiang lo.

Mizoramah hian ruihhlo chi hrang a tam hle a, India siam damdawi pangngai ruihna atana an hman chi a awm a, khaw chhak aṭanga ruihhlo lo lut a awm bawk a, heng bakah hian ruihtheih dangte pawh a awm ang. Hengte hi dan anga zu zawrh a nih tak avang hian an zalen ve ngawt thiang lo a, khuahkhirh an ngai a, chu chu sorkar mawhphurhna a ni.

Central YMA lamin Mizoram din-hmun leh sorkar hnathawh dan hrain an ṭhahnemngaihnain ruihhlo dotu pawl SRS an din a, an
ṭangkai takzet a ni. SRS hi din hmasak a nih khan an kal chak lutukin sawi kai deuha hna an thawh chang a awm a, kha kha chu a hunlaiin a zir vang pawh a ni thei ang. Tunah SRS fim zawk leh fing zawk, Mizorama ruihhlo tihrem tuma dan hnuaia chak taka hnathawk an awm a, heng mite hian an tha thlah lo se, theihtawp chhuahin ruihhlo do hna hi chhunzawm zel rawh se.