Vanglaini - Rock leh metal band hmingchawia sak maimawm 'species' thar pali

KHAWTHLIR

Thisen pe

Champhai police-te chuan nimin khan Police Commemoration Day pualin Champhai District Hospital-ah blood donation camp an huaihawt a, district SP Rex Zarzoliana hoin thisen unit 19 an pe a, petute mipa 18 leh hmeichhia pakhat an ni.

Thutlukna siam lo

Zoram Medical College (ZMC) chu society anga awm zel tur nge, state sorkar hnuaia awm tur tihah Health department chuan thutlukna a la siam lo. Thu dawn danin, ZMC society anga awm tur nge, state sorkar hnuaia awm tur tih zirchiang tur committee din a ni a, committee chuan sorkarah report an thehlut tawh. Report-ah chuan thutlukna mumal an siam lo a, chuvang chuan Chief Minister hoa thutlukna siam a ni ang.

License siamtir turin hriattir

Lunglei DC chuan, Lunglei district-a airgun nei zingah license/certificate la siamtir lo leh nei lo mi eng emaw zat an la awm tih hriat a nih thu a tarlang a; airgun neite chu a kah nat zawng azirin October 28-31, 2019 chhungin arms license/certificate siamtir vek turin a hriattir. Arms license/certificate nei loa airgun kawlte chu mansak leh thubuai siamsak theih an nih thu tarlangin, "Sorkar thu zâwm loa arms license/certificate nei loa airgun kawlte chu an silai mansak leh Arms Act, 1959 Section 24&25 angin thubuai siamsak theih an ni," a ti.

Kawng khar dawn

Traffic SP chuan thupek chhuahin PHE dept. hnuaia Aizawl Water Distribution Division North chuan October 21, 2019 aṭangin Durtlang Leitan leh Synod Hospital, Durtlang inkar kawngah pipe phum hna an thawh dawn avangin helai kawng hi hnathawh zawh hma chu khar a nih dawn thu a tarlang. Hnathawh chhung chuan Presbyterian English School peng aṭangin motor inherna lamah lirthei te tlan vek tur a ni.

Candidate pahnih

Mara Autonomous District Council (MADC)-a Tokalo MDC constituency by-election neih turah returning officer Bhupesh Chaudhary, district bawrhsap hnenah mi pahnihin nomination an thehlut. Hming pe lutute hi BJP aṭangin M Laikaw leh MNF aṭangin Chotha Hlychho te an ni a; vawiin tlai dar 3 thleng inhnuhdawhna hun hawn a ni ang.

DAWNTISEI

Rock leh metal band hmingchawia sak maimawm 'species' thar pali

Rock leh metal music ngaina em em mai Brazilian biologist Christina Rheims chuan maimawm 'species' thar pali a hmuchhuak a, a species hmuhchhuah tharte hi a rock band ngaihsan Iron Maiden, Scorpions, Def Leppard leh Angra band member-te hming chawiin a sa.

A maimawm hmuhchhuah tharte hi Extraordinarius bruceickinsoni, Extraordinarius klausmeinei, Extraordinarius rickalleni leh Extraordinarius andrematosi tih a ni. Iron Maiden frontman Bruce Dickinson, Def Leppard 'Rick Allen', Scorpions 'Klaus Meine' leh Angra vocalist André Matos-te hming chawiin a sa a ni.

Maimawm 'species' thar palite hi Sparianthinae family zing ami an ni a, Mexico chhim lam aṭanga Argentina hrul a awm Neotropical region-ah an khawsa a ni. "Extraordinarius" genus hi Christina Rheims-i'n maiawm a thliarhranna (category) thar a ni.

"A bik takin Def Leppard drummer Rick Allen hming chawia 'species' thar hming ka sak hi a chhan a awm. Rick hi a ban pakhat bul mahse a ban pakhat zawk chhawr ṭangkaiin, a career-ah hian a buai phah lo a, chuvang chuan amah hi "Extraordinarius" zingah hian a tel a ni, tiin Christina Rheims chuan Rick hi a fak hle.

Share this Post

Login to comment

No Comments