Red Ribbon School Quiz-ah PES, Republic Veng an thiam ber

State Level Red Ribbon School Quiz competition 2023-ah Presbyterian English School, Republic Veng pakhatna an ni a, Regional Level School Quiz-ah Mizoram ai an awh dawn. Quiz hi Mizoram State AIDS Control Society (MSACS) buatsaih a ni.

Quiz-ah hian Mizorama district 11-ah DAPCC-te nena ṭanghoin school level quiz an buatsaih phawt a, chuta ti ṭha school 10-te chu District Level Red Ribbon School Quiz-ah an tel. District level quiz-a pakhatna ṭheuhte chu state level Red Ribbon School quiz-ah an tel leh bawk.

District tin champion-te chu Maraland Academy (Siaha), Adventist English School (Lunglei), Marian High School (Serchhip), Harvard Higher Secondary School (Lawngtlai), Oxford English School (Saitual), Hnahthial High School (Hnahthial), Presbyterian English School (Mamit), Presbyterian English School (Champhai), Presbyterian English School (Aizawl), Kawnpui Higher Secondary School (Kolasib) leh St. Joseph School (Khawzawl) te an ni.

Inelna hi October 11- 13, 2023 chhung khan Ignite Studio-ah buatsaih a ni a, final-ah sikul pathum an an intihsiak. Aizawl District-a pakhatna PES, Republic Veng chu Mizoram pumpuia Red Ribbon School Quiz-ah an champion a, an sikul aiawh hian Janet Malsawmpuii (College Veng) leh Zonunsangi (Republic Vengthlang)-te an tel.

Maraland Academy, Siaha chu pahnihna niin, PES, Champhai Zotlang chu pathumna an ni.

Red Ribbon Quiz buatsaih chhan chu - HIV/AIDS kaihhnawih thil hriatna tihzauh a ni a; zirlai, zirtirtu leh quiz thlirtute'n HIV/AIDS kaihhnawih an la hriat ngai lohte an hriat belh theih nan leh HIV laka an him theih nan a ni.