Hidden Kingdom World Music Festival-ah Boomarang

Bhutan-ah nimin atang khan Hidden Kingdom World Music Festival buatsaih a ni a, he festival-a hian Mizoram aṭangin Boomarang band pawh an perform dawn.

Hidden Kingdom World Music Festival hi kum tina buatsaih niin kumin hi a ṭum thumna tur a ni. Bank of Bhutan buatsaih a ni a, department of tourism, Bhutan-in a sponsor a ni. He festival hi Bhutan culture leh identity chawi larna tura tih a ni a, local leh international artist-te sawm an ni ṭhin. India rama aṭanga band sawm zingah Boombarang pawh hi an tel a, Pathianni zanah an perform ang.

Kumin festival hi October 6 - 12 chhungin Phuntsholing-a Amo Chu Riverside-ah neih a ni dawn a, theme atan 'Music4all Leaving No One Behind' tih hman a ni.

An live-act hmuhnawm tak mai, Boomarang hi Mizoram pawn lamah pawh hriat an hlawh hle a, music festival dangah pawh an lo perform fo tawh. Heng zingah hian Great Indian Rock, Independence Rock, Hornbill National Rock Contest, Korea Indo Fest, Cry Freedom, South East Asian Music Festival, East Wind Music Festival, Escape Festival, Octave, Hanoi Vietnam Festival, leh Contra Bands Tour Spring Scream Music Festival Taiwan-te pawh a tel. Rolling Stone Magazine pawhin "Top Ten Indian Bands to Watch Out For"-ah a lo telh tawh ngat an ni.

Boomerang hian award pawh eng emaw zat an dawng tawh a, an award dawn zingah hian Nokia Lords of Music, Hornbill National Rock Contest, Lelte Music Awards, Mizo Music Awards, Jack Daniel's Best Bass Player Award leh North East Best Guitar Player Award-te an tel.