Assam : Ruah sur avangin Guwahati-ah tui a tling nasa

Assam-ah ni eng emaw chen ruah nasa tak a sur leh avangin Guwahati khawpui leh hmun dang ṭhenkhat chu tuiin a chim nasa leh a, khawsak phung a tihbahlah phah a ni.

Guwahati-a chengte chuan ruah sur hlekah khawpui chu tuiin chimin a tling nasa thei hle a, thuneitute chu khawpui chhung drainage system ngaihsak tawk loah an puh. "Sorkar chuan flyover leh bridge siam lam ringawt a buapui a, hemi atan hian sum pawh vaibelchhe tel a seng a ni. Mahse kum tam tak chhung ruah sur apianga Guwahati khawpuia nasa taka tui tling chu an ngaihven lo a, siam ṭhat tumin sum an seng duh ngai lo," tiin an sawi.

Ruah sur nasa avang hian Guwahati khawpuia kawngpui pawimawhte chu tuiin a chim leh vek a ni. Hmun hniam lama chengte phei chu tuilian tuar leh mai thei dinhmunah an awm leh bawk.

Guwahati khawpui bakah state hmar lam, Arunachal Pradesh nena an inrina bul lama khaw eng emaw zat chu ruah sur nasa avangin tuiin a chim leh bawk. Nimin zing dar 8:30 thleng khan district pangaah ruah sur nasa avangin 'red alert' hi tihchhuah a ni a, lower Assam lam district pathumah 'orange warning' tihchhuah a ni bawk.