Vanglaini - WWE 'Raw' theme song-ah Skillet hla hmang

KHAWTHLIR

Secretary puitling

Appointments Committee of the Cabinet chuan Mizoram sorkara chief secretary ni mek Lalnunmawia Chuaungo chu sorkar laipuia secretary puitling (rank)-ah a hlângkai. Lalnunmawia Chuaungo hi 1987 batch IAS, Gujarat cadre a ni.

Thisen pe

Mara Thyutlia Py (MTP) Siaha College Vaih Branch chuan MTP Day pualin nimin khan Siaha District Hospital tan thisen unit 34 an pe a, a petute mipa 24 leh hmeichhia 10 an ni.

Zote S-in lawm

Zote South khua chuan hun rei tak chhung Lunglei district-a an awm hnuah, tun hnaia Mizoram sorkarin Serchhip district-a a dah chu nimin khan an khaw community hall-ah an lâwm.

NBHM siam thar

National Board for Higher Mathematics (NBHM) chuan Mizoram tan bik NBHM Mizoram Region a siam thar a, Mizoram regional coordinator atan Dr LP Lalduhawma a ruat nghal bawk. Dr LP Lalduhawma hi Pachhunga University-a assistant professor a ni.

Environment Awareness

UPC North East India chhunga Aizawl East District PYD hnuaia Environment Committee leh ASEP chuan October 8, Thawhlehni zan khan Bawngkawn UPC Kohhran Hall-ah Environment Awareness Campaign an buatsaih a, pastor bial hrang hrang aṭangin PYD hruaitu mi 150 vel an tel.

Tripura-a awm hlen turin duhsak

MPC party chuan thuchhuah siamin, Bru-te chu anmahni duh thu ngeia Mizoram chhuahsantute an nih thu an tarlang a, "Mizorama lo kîr duh tawh loa Tripura-a chàm hlen duh zawktute hi an duhthlanna ang ngei hian Tripura-ah chêng hlen mai se kan duhsak hle a ni," an ti. Bru-te'n Mizorama an duhthála an khawsak theihna tura phût an neihte chu Mizo hnam leh sakhaw tana him lo thei a nih avangin, tihhlawhtlin chia an ngaih loh thu an puang bawk.

Project training

Lawngtlai DC Shashanka Ala hmalaknaa Lawngtlai district-a 'Kan sikul, kan huan' project kalpui mek thawh hnihna (phase-II) atana thlan sikul leh anganwadi centre-a zirtirtu leh thawktute tan nimin khan Lawngtlai district-a RD block hrang hrangah hmalak dan tur inzirtirna buatsaih a ni.

DAWNTISEI

WWE 'Raw' theme song-ah Skillet hla hmang

American Christian rock band Skillet hla 'Legendary' chu World Wrestling Entertainment (WWE) 'Raw'-a theme song-ah hman a nih dawn thu an twitter-ah Skillet hian an tarlang.

WWE 'Raw' chu Thawhṭanni zan khan hawnna hun hman a ni a, USA Network broadcast-ah pekchuah niin Skillet-te hi an zai bawk a ni.

WWE-ah hian an Skillet hla hi an vawikhat telhna a ni lo. A hmain an hla 'Monster' leh 'Hero'-te chu WWE SmackDown vs. Raw 2010 video game-ah hman a lo ni tawh bawk.

Skillet vocalist John Cooper chuan an hla 'Legendary' lyrics hi, 1 Korinth 9:24 zulzuia phuah a nih thu a sawi. Mainstream industry tam tak chuan Isua chungchang hi sawi lang tawh lo turin thurawn min pe fo a, mahse kan band chuan heng mite thusawi hi kan hnawl zel a ni, a ti.

Share this Post

Login to comment

No Comments