Chhattisgarh BJP-te'n Congress sorkar beih nan 'BhuPay' siam

Chhattisgarh-a Congress kaihhruai sorkar eirua puh a nih chungchangah BJP-te chuan Bhupesh Baghel leh Congress chu bei chhunzawmin, 'BhuPay' QR code an siam. 'BhuPay' QR code scan hian a hmangtute chu website pakhatah hruai lutin, he website-ah hian thuneitute eirukna leh a kaihhnawih chi hrang hrang hmuh theihin a awm a ni.

Website-ah hian zu zawrh chungchanga eirukna te, CGPSC hna laka tihdanphung pela sorkar chetna te, Public Distribution System (PDS) hnuaia buhfai pek chhuah dan bakah, lungalhthei laih chhuah leh Gauthans chungchanga cheng vaibelchhe tel tihchingpen chungchang te tarlan a ni. Heng bakah hian Rahul Gandhi-a'n Bharat Jodo Yatra a neihna atan state sorkarin Rs. vbc 1,500 a lo hui ve niin tarlan a ni bawk. BJP hian Congress sorkar chu District Mineral Foundations (DMF) hnathawha commission an lo lak thu leh pawisa inthapna hmun, Mahadev thubuaia sorkar duhsak mi eng emaw zat an tel ve thu te an tarlang.

Website luhna tur QR code tlangzarh a nih hnu hian union minister for information and broadcasting, Anurag Thakur chuan BJP-in technology hmanga Bhupesh Baghel kaihhruai sorkar eirukna leh dik lohna zawng zawng an la tarlan vek tur thu sawiin,"Prime Minister Narendra Modi-a'n Operation Ganga hmanga indona hmuna India zirlai 23,000 a chhanchhuah laiin, Chhattisgarh-a Congress sorkar erawh chuan zu chu lui ang maia lo luantirin, a hralh chhuahna kawngah pawh an lo eiru leh zel. Gangajal keng meuha zu zuar lo tura thu tiam khan a bawhchhe nasa hle a ni," a ti zui bawk.