PwD Commissioner thlak hrim hrim tum lo turin FMDO-in sorkar an ngen

Mizoram sorkara inziak lut rualbanlo páwl pakua intèl khawmna, Federation of Mizoram Disabled Organization (FMDO) chuan, Mizoram sorkarin September 19, 2023-a Persons with Disabilities (PwD) commissioner lakna tur advertisement a tihchhuah chungchangah, mi thar duh vang hrim hrima commissioner ni mek thlâk lo turin sorkar an ngen.

FMDO chuan thuchhuah siamin, PwD Commissioner ni mek hun chu February 2024-a tàwp tur a nih thu an sawi a, "A hmachhawp kal laite chhunzawm ngei se kan duh. Recruitment and Conditions of Service Rules, 2016, Rule 7(2)-in a sawi angin, commissioner hi term hnih emaw, kum 65 tlin hma chelh theih a ni a, mi dang qualify leh rualbanlo tana ṭha zawk leh experience nei ṭha zawk an awm a nih loh chuan mi thar duh vang hrim hrima thlak lo turin kan ngen a ni," an ti.

PwD commissioner term khat kum thum zel a ni a, PwD Commissioner ni mekin term khatna a hmang mek a; commissioner lakna turin Social Welfare & Tribal Affairs Principal Secretary-in September 19, 2023 khan advertisement a chhuah a ni.

FMDO chuan, The Mizoram Commissioner for PwD (Recruitment and Conditions of Service) Rules, 2016-in a phût ang thiamna nei chauh lak ni se an duh thu leh, danin a phût ang tlinte chauh lak an phût thu an tarlang a; Commissioner ni mek chu recruitment rules-in a phût ang zawng zawng tlin vek a nih thu an tarlang bawk.