Fa pathum nei chin an nihlawh dawn - Lalduhoma

ZPM leader Lalduhoma chuan, ZPM party-in pian pun policy an neih thu sawiin, fa pathum nei chinte an nihlawh dawn a, zirnaah leh thil dangah lawmman siam an tum thu a sawi.

Lalduhoma hian October 3, Thawhlehni khan Chhiahtlanga vantlang inkhawmah thu sawiin, "Mizote kan pung chak lo hle mai a, hei hi ZPM chuan a ngaimawh a, pian pun policy kan nei. Fa pathum nei chinte chu kan nihlawh dawn a, zirnaah leh thil dangah lawmman siam kan tum. Kan tlem lutuk a, tam lamah ṭan lak a ngai, kohhranho nen hma kan la tlang dawn a ni," a ti.

Ruihhlo laka Mizote an himna turin ZPM-in thapui an thawh dawn tih sawiin Duhoma chuan, "Budget pawh kan ui dawn lo. India rama AIDS vei tam ber state kan ni hi kan vei a ṭul tak zet. Ṭhalai kan thi hnem a, a bik takin mipa kan thi hnem hle a, ruihhlo vang a ni," a ti a, ruihhlo laka Mizo ṭhalaite chhan turin ṭanlak nasat an tum thu a sawi.

Lalduhoma chuan, candidate atan eiru lo tur an dil ṭhin nia sawiin, "Ram rorelna ṭha din tur chuan candidate ṭha chauh ni loin, eiru lo tur, corruption laka fihlim ngam kan neih a ngai," a ti.

ZPM Leader chuan, Mizorama sorkarna siam turin mi leh ṭawng chi hrang hrangte an leng vek tur a nih thu sawiin, "Mipui movement a nih angin mi tin a huap zo tur a ni a, ṭawng leh chi ang mai ni loin, kohhran zawng pawhin a huap zo thei ang berin kan kal," a ti a; Seventh Day, Salvation Army, UPC, Baptist, Presbyterian leh ECM aṭangtein candidate an neih thu a sawi.

Tun anga ṭhalai leh nute'n ram an la vei ngai loh thu sawiin Lalduhoma chuan, "Hei hian kan ram inrêlbàwlnaah harh tharna a thleng mek tih a entir," a ti a; "ZPM kan vote hian kan ram rorelnaa Pathian ram a thlen theihna tur kan vote tihna a ni," a ti bawk.

Lalduhoma hian ZPM zawm thar mi 405 a lawm lut niin ZPM thuchhuah chuan a tarlang.