Ellen DeGeneres-i'n American pop rock band Jonas Brothers a kawmnaah, Priyanka Chopra pasal Nick Jonas chuan nakkuma neih tur The Voice season 18-ah coach a nih tur thu a sawi chhuak.

Nick hian American singer Gwen Stefani  a thlak dawn a, Blake Shelton, Kelly Clarkson leh John Legend-te nen an ṭhuho dawn ta a ni.

Jonas Brothers-in interview an neihnaah hian, Nick chuan naktukah 'secret' puan chhuah tur ka nei a ti a, mahse Ellen chuan naktuka i thil puan chhuah tum hi ka tihchhiat sak dawn che, video clip hi han en teh u tiin fiam pahin a sawi a; a hnuah Blake Shelton chuan video hmangin Nick chu The Voice-ah coach thar tur a nih thu chu rawn sawi langin, lawmpuina thu a rawn sawi.

He interview-ah hian video clip hmangin Kelly Clarkson leh John Legend pawhin Nick chu lawmpuina thu an rawn sawi a, an pahnih hian Nick chu team khata awm a, lam ṭangah an sawm ve ve bawk. 

Blake, Kelly leh Legend-te video an en zawh hian, Nick chuan 'secret' chu mite hriatah puanzar a ni ta, tiin an video clip en chu a comment zui.

Nick chuan coach a nih dawn avang hian a lawm thu a sawi nghal bawk a, "Kelly-i'n thawhpuia a sawmna chu Legend-a sawmna aiin ka pawm hmel zawk," tiin fiamthuin a sawi zui .

Tunah hian Jonas Brothers hian an album pangana, kumina an tlangzarh "Happiness Begins" tour an nei mek a, nakkum February 22-ah France khawpui Paris-ah an tour hi a zo ang.

Share this Post