Mizoramah change kan hmu dawn a, Congress-in kan thlentir dawn - Lalsawta

Mizoram Pradesh Congress Committee (MPCC) president Lalsawta chuan, Mizoramah thil inthlak­thleng an hmu dawn a, chu chu Congress party-in an thlentir dawn niin a sawi.

Lalsawta hian nimin khan Diakkawn YMA Hall-a Kolasib district Congress conference an hmanpuinaah thu sawiin, "Kumin inthlan zet chu Mizoramin change kan hmu dawn a, chu change chu Congress-in Mizoram tana sorkar ṭha pek kan duh avanga kan thlentir a ni ang. Vawiinah hian Congress thar Mizoramin an hmu a, Mizorama Congress lo danglam ta hi kan duh dan tak a ni," a ti.

Politics ram hluia chengte'n sum an hmachhuan nia sawiin Lalsawta chuan, "Keini chuan Lalpa, khawvela a lal ram din tura min dahtu lam kan hawi," a ti a; MNF-te'n retheite retheihna chu bahhnuktê ang maia ngaiin Rs 25,000 an tawktarh hian din­chhuahna tur a thlen dawn lo niin a sawi.

Lalsawta chuan, "Kan ram, kan hnam, kan sakhaw nuaibo tumtu BJP hi i do ang u," a ti a; duhdah taka sum enkawl vangin Mizoramin leiba a ngah nia sawiin, "Nau piang hlim pawhin leiba sing tel nei ang zel kan ni. Congress a sorkar chuan Mizoram sum kan siamṭha ang a, ṭang puihna hmangin mipui dinhmun kan siamṭha ang a, Old Pension Scheme ṭha takin kan kalpui dawn," a ti. BJP chu MNF-in an thawhpui thu a sawi rualin ZPM pawh BJP ṭhiana siam tumah a puh.

MPCC President chuan, Congress party-in Pathian duh danin inthlan an hmachhawn dawn nia sawiin, "Pathian duh dan taka inthlan kan hmachhawn dawn avangin kan sorkar ngei dawn tih hi ka ring tlat a ni," a ti.