Exhibition-ah cheng nuai 30 man hralh

Raj Bhavan tuala ni thum chhung Gandhi Jayanti Exhibition buatsaih chu nimin khan khâr a ni a, Governor Dr Hari Babu Kambhampati-a'n a hmanpui. Exhibition-ah hian cheng nuai 30 man thil hralh a ni.

Commerce & Industries director Florence Zotluangpui tarlan danin, Exhibition-ah hian ni thum chhungin cheng nuai 30 man vel thil hralh chhuah a ni a, sum hmuh tam zawk chu handloom & handicrafts aṭanga hmuh a ni.

Exhibition chhimtu zingah sumdawnna atan bul ṭanna sum chungchang zawhfiah tum mi 860-in Mizoram Rural Bank duty-te an dàwr a; puan tahtu mi 500 chuangin Department of Science & Technology-in puantah software an siam 'Zopuan' chungchangah department aiawhte an dawr bawk.