Joker A nui ring ber

Kar tawp Box Office-ah bei­sei ang ngeiin Joker (2019) chu a nui ring hle a, sum lalut hnem ber dinhmun a luah nghal. Abominable chu pahnihna niin, Downton Abbey chu pathumna a ni bawk.

Joker a nui ring

Tlangzarh a nih hma hauh aṭang­in boruak nei lian tawh a ni a, Zirtawpni liam ta khan US-ah tlangzarh a ni ta a, Inrinni leh Pathianni khan $96,202,337 a lalut hman.

Tun kar tawp Box Office chart-ah khan sum a lalut hnem lawr lak a, a hit nghal viau pawh hi a mak hran lo. 

September thlaah daih tawh khan, US-a tlangzarh a nih hma, premier-a nihna Venice Film Festival-ah Golden Lion award a dawng tawh a, Oscar dawng thei tur pawhin a dinhmun a ṭha hle.

Inrinni leh Pathianni khan US-a theatre 4,374-ah chhuah a ni a, film critics lam pawhin an fak hle. A film siam nan hian $mtd 55-70 vel seng anga chhut a ni a, hei hi US-ah ringawt pawh a khum chiang hle a, khawvel puma a sum lakluh chu $mtd 248.4 a tling tawh a ni.

Lemchan huphurhawm Joker

Joker sawi apianga mi tam tak rilrua lang ziah tawh tur chu Heath Ledger kha a ni. 

Christopher Nolan-a Batman: The Dark Knight-a Joker lema chang Heath Ledger khan Joker boruak hi a tilian hle a, a part a hnehsawh em avang khan Joker lema han chan leh pawh hi thil huphurhawm tak a ni ngei ang.

Joker character-in a nun a luhchilh a nin avangin, film chan an zawh hnu lawkah a thi ta nite pawhin mi ṭhenkhat chuan an sawi hial a nih kha.

Ledger-a hnu lama Joker lema chang apiang chu Ledger nen hian a khaikhin loh theih loh. Jared Leto pawh kha nasa taka khaikhin a lo ni tawh a, tunah Joaquin Phoenix nen pawh hian khaikhin a ni leh mek. Hetichung hian Joaquin hian Joker hi a hlawhtlinpui nghal der tawh tih a lang.

Joker (2019)-ah hian engtin nge Arthur Fleck chu Joker a lo nih chhoh dan vel a lang a, Batman fan tam takin Batman 'villain'-a an duh ber leh an huat ber Joker chu engtia lo sual chho ta nge a ni tih a lang a ni.

No.2-ah Abominable

Chart hmasaa sum lalut tam ber computer-animated adventure film Abominable chu pahnihna a la ni a, sum lakluh lamah erawh Joker a phak tawh lo hle thung. Abominable hian khawvel puma a sum lakluh tawh chu $77,854,970 a ni a, hei hian an film siamna budget pawh a la khum ṭawk chauh a ni.

Box Office chart-a pakhatna pawh lo ni tawh Downton Abbey chu sum lalut tam pathumna a ni a, Hustlers chu palina niin It: Chapter Two pawh pangana a la ni phak bawk.

Bollywood lam an lang

October 2-a tlangzarh Bolly­wood film War (2019) chu US Box Office-ah sum lalut tam pakuana a ni pha daih mai. Hei hian a hmuh­nawm zia a tilang chiang hle awm e.

War (2019) hian India ram bikah chuan tlangzarh nia sum lalut tam ber record pawh a lo siam tawh a, Avengers: End Game a khum a ni. Hrithik Roshan leh Tiger Shroff-te channa hi film lam tuipui tan chuan hmaih phal chi a ni lo ang.

Box Office Top 10

1Joker (2019)$mtd 96

2Abominable$mtd 11

3Downton Abbey$mtd 7

4Hustlers$mtd 6 

5It: Chapter Two$mtd 5

6Judy$mtd 4.5

7Ad Astra$mtd 4.1

8Rambo: Last Blood$mtd 3

9War (2019)$mtd 1

10Good Boys$mtd 0.8




Share this Post

Login to comment
No Comments