Prime minister Narendra Modi chuan Asia chhim leh chhimthlang lam ramte puala Bay of Bengal Initiative for Multi-Sectoral Technical and Economic Cooperation (BIMSEC) summit vawi rukna hmang turin Bangkok, Thailand chu nimin Ningani khan a thleng. Thailand deputy prime minister leh minister of transport ni bawk Suriya Jungrungreangkit chuan PM Modi hi a lo hmuak. PM hian Thailand-a hun a hman zawhah Sri Lanka a tlawh nghal bawk ang.
PM hian a cham chhungin Thailand prime minister Paetongtarn Shinawatra leh ram hruaitu hrang hrang nen a kawm ang. Inkawmna kaltlang hian hunrei tak aṭanga ram pahnihte thawhdunna lo awmte tih hmasawnna leh kawng hrang hranga thawh dunna ṭha neih dan turte sawi a ni dawn bawk.
Kumin BIMSTEC theme atan hian “prosperous, resilient, and open BIMSTEC” tih hman a ni, summit neih hnuhnung ber chu 2018 kha niin Kathmandu-ah neih a ni.
Modi chuan BIMSTEC huam chhungah India ram hmarchhak chu a hmun lai takah a awm thu sawiin, hei vang hian BIMSTEC huam ram hrang hrang hruaitute nen a in kawm leh thawhhona ṭha neih chungchang sawina hun neih chu a duh thu a tarlang. Sri Lanka-ah hian ni hnih a cham dawn a, hei hi Sri Lanka president atana Anura Kumara Disanayake thlan tlin a nih hnua a tlawh vawikhatna tur a ni.
Bangkok-ah PM leh Yunus in kawm dawn
Modi-an BIMSTEC summit kar lakah Bangladesh tualchhung buaina chhuak vanga chief advisor hna chelh lai lawk tu, Mohammed Yunus nen inkawmna hun an hmang nghal dawn a ni. Ram pahnih hruaitute inkawmna neih tur thu hi Bangladesh foreign secretary Jashim Uddin chuan Nilaini khan thuthar thehdarhtute hnenah a sawi.
Ram pahnih hruaitute inkawmnaah hian Bangladesh-a Rohingya raltlan ai awh Khalilur Rahman bakah ram aiawh mi challang tak tak an tel dawn bawk. Bangladesh chief advisor leh PM modi te in kawmna hi Bangladesh a rorel lailawk a din hnua ram pahnih hruaitu lu inkawmna hmasa ber tur a ni bawk.
Tun hnaiah Bangladesh tualchhung buaina leh hnam hnuaihnung zawk leh sakhaw tlem zawk laka hleilenna thleng ṭhin vangin hruaitu ṭhenkhat chuan Bangladesh hi an lo tlawh zeuh zeuh tawh ṭhin a ni.
