Ministry of Information and Broadcasting chu Lok Sabha inthlanpui neih tur atana Model Code of Conduct hman a nih tawh hnuah Prime Minister Narendra Modi-a election campaign-na tihchhuahna, NaMo TV channel tlangzarh a nih chungchang sawifiah turin hriattir a ni.

NaMo TV hi March 31 khan tlangzarh niin, he channel-ah hian PM Modi-a thusawi hrang hrangte tihchhuah chhunzawm reng a ni a, rally a neihte pawh live-a pekchhuah a ni.

Election Commission in hriattirna a pek hnuah, I&B ministry chuan NaMo TV chu licensed channel ni loin, direct-to-home advertisement platform a nih thu leh, a senso pawh BJP in a tum vek thu a sawi.

EC hian Doordarshan hnenah pawh March 31-a an channel-a PM Modi-an a campaign auhla, 'Main bhi chowkidaar' chungchanga a thusawi lai darkar khat zet live-a an tihchhuah chhan pawh sawifiah turin a hriattir bawk.

Congress leh AAP chuan MCC hman a nih hnuah NaMo TV tlangzarh a nih chungchang hi EC hian an lo thleng tawh a, EC chuan eng angin nge action a lak tihte an zawt a ni. AAP chuan MCC hman a nih hnuah political party te hnenah an puala TV channel siam leh tichhuak turin phalna pek theih a ni ngai em ni? tiin EC hi a zawt. Congress pawhin NaMo TV chu PM Modi leh BJP fakna chauh tihchhuahna a nih thu EC hnenah ziakin a lo thlen tawh bawk a ni.

NaMo TV hi PM hming chawia phuah niin, a logo-ah pawh a thlalak hman a ni. He channel hi tu ta nge, tu sum hmanga siam nge tih sawichian a ni lo. NaMo TV hi Information and Broadcasting ministry website-in private satellite TV channel permit pek list a tarlan zingah pawh a tel lo.

EC hian Indian Railways chu MCC hman a nih hnuah PM Modi thlalak chuanna ticket a pekchhuah chhunzawm avang leh, rel chhunga passenger-te hnena thingpui semna atan paper cup hmanah Modi-a campaign auhla, 'Main Bhi Chowkidar' tih thu inziahna a hman avangin insawifiah turin a lo hriattir tawh bawk.