Jammu and Kahsmir-a kar kalta Ningani-a Pulwama-a Jaish-e-Mohammed (JeM) firfiak pakhatin thihchilh bomb hmanga Central Reserve Police Force (CRPF) convoy a beih avanga sipai 40 an thih hnuah, J&K sorkar chuan nimin khan an state-a inlakhran duhtu, separatist hruaitu panga-te security a pek chu a titawp nghal. 

J&K sorkar hian separalist leader - Mirwaiz Umar Farooq, Abdul Ghani Bhat, Bilal Lone, Hashim Qureshi leh Shabir Shah-te chu venhimna a pe a, hei bakah hian sorkar facility pawh pek an ni bawk. Hengte hi nimin khan a tihtawp sak nghal vek a ni. Hetihlai hian Pakistan thlawptu, separatist leader Syed Ali Shah Geelani erawh security tihtawpsak zingah hian telh a ni lo thung. State sorkar chuan separatist leader-te security tihtawp bakah, motor hman tur a pek ṭhin pawh a titawp nghal bawk a ni.

Pakistan firfiak pawl, Jaish-e-Mohammed (JeM) chuan CRPF convoy beitu an nih thu hi an sawi a, sipaite chuanna motor su a, a bomb phurh kg 300 dawna rit tipuaktu kum 22 mi, Adil Ahmad Dar thlalak leh video clip-te pawh a tichhuak a ni. 

Intelligence lamin an sawi danin, CRPF convoy beihna hi JeM commander pahnih, Ghazi Rashid leh Kamran-te ruahman niin, bomb pawh hi Dar hnenah an pe a ni. Thla hmasa khan Poonch kaltlangin Pakistan aṭang hian India ramah JeM firfiak 15 vel an rawn lut a, an zingah hian Kamran pawh hi telin, Dar hnenah pek tur hmanrua leh bomb te pawh hi a rawn keng nia sawi a ni. 

Firfiak beihna thlen vang hian kar kalta Inrinni khan Union Home Minister Rajnath Singh-a kaihhruaiin New Delhi-ah all-party meeting neih a a, meeting-ah hian Pulwama-a firfiak pawikhawihna thlen an demna thu resolution pass a ni.  Pawikhawihna thleng an dem thu an sawi rualin, party hrang hrangte chuan ramri kaltlanga firfiakte chetna thleng fo bei let turin India chuan theihtawp a chhuah zel tur thu an sawi bawk. All-party meeting-ah hian party hrang hrang hruaitute an tel ṭha hle. 

WION (World Is One News) TV channel chuan J&K-a Pakistan firfiak pawl pawikhawihna thlen vang hian Dubai-a Global Summit a buatsaih tura Paksitan President hlui Pervez Musharraf, Minister of Information and Broadcasting Fawad Chaudhary, India-a Pakistan High Commissoner Abdul Bsit leh Pakistan Foreign Secretary hlui Salman Bashir a sawmna te a hnukkir nghal. Global Summit hi Ferbuary 20 hian neih a ni dawn a ni. 

Sorkar laipui chuan Pakistan-a hmunpui nei, firfiak pawlin India ramchhunga pawikhawihna rapthlak tak an thlen avang hian Pakistan hnena Most Favoured Nation (MFN) status a pek chu a sut nghal. MFN status hi sumdawnna lama inzawmna ṭha a neihpuite hnena a pek a ni. Pakistan status hlihsak a nih vang hian nimin aṭang hian Pakistan aṭanga bungraw lakluh ṭhinah chhiah lak chu 200% zet tihsan a ni nghal. Hei hian Pakistan-in India rama bungraw a thawnluh kawngah nghawng pawi tak a neih rin a ni. Kum 2017-2018 chhunga India-Pakistan insumdawn tawnna hi US dollar tluklehdingawn 2.41 a tling pha a ni.

Munich-a Security Conference neihah nimin khan India chuan Pulwama-a sipaite beih an nih chungchang hi sawichhuakin a dem thu a tarlang. He conference-ah hian ram hrang hrang hruaitu leh security expert 600 chuang an tel a, security kaihhnawih thil hrang hrang, a bikin international terrorism chungchang sawiho a ni. Conference-ah hian India aiawhin Deputy National Security Advisor Pankaj Saran a tel a ni. 

Kashmir-a pawikhawihna rapthlak tak thleng vang hian ram chhung hmundanga Kashmir mi awm, a bikin zirlai awmte chuan vau leh harsatna an tawk. Hei vang hian CRPF chuan Kashmir mi  harsatna tawkten an biak pawh theihna tur telephone helpline an siam a, an theih anga puih an tum thu an sawi. CRPF chuan firfiak beihna avanga an sipai pui thite an sun hle tih an sawi rualin, Kashmir mipuite himna chu an ngaih pawimawh thu a sawi. Sorkar laipui pawhin state hrang hrang hnenah an state chhunga Jammu and Kashmir aṭanga kalte himna chu ngaihsak turin a chah bawk. 

CRPF chuan Pulwama-a bomb puaka sipai thi, a taksa peng nia sawi thlalak chu social media lamah thehdarh a nih thu sawiin, he thlalak hi a dik lo tih an sawi. Pulwama-a thil thleng chungchangah thlalak dik lo leh thu dik lo post a tam hle tih sawiin, hetiang thu thehdarh lo turin mipuite an ngen. Hetiang post a awm a nih chuan webpro@crpf.gov.in a report turin an ngen bawk. 

Sipai martarte awmna state hrang hrang chuan an chhungte ralna sum an pek tur tur hi an puang tawh a, mi hrang hrangin martar chhungte ralna tur hi an thawh bawk. Uttarakhand IAS association chuan martar chhungte tan hian an nikhat hlawh an pe dawn tih an puang a, pawisa hi Delhi-a CRPF headquarters-ah an pe dawn a ni. Uttar Pradesh IPS Association pawhin an ni khat hlawh an pek tur thu an sawi bawk. Bollywood superstar Amitabh Bachchan pawhin martar chhungte hi cheng nuai nga ṭheuh a pek tur thu a puang.