Punjab chief minister Captain Amarinder Singh chuan prime minister Narendra Modi hnenah an state-a tuilian tuarte ṭanpui nan cheng vaibelchhe 1000 pe turin a ngen. 

Ruahsur nasat vangin Punjab-ah hian tuilianin harsatna hrang hrang a thlen a, hei vang hian lo neituten an crop loan rulh tur chungchangah pawh harsatna an neih phah thu Punjab CMO thuchhuah chuan a sawi. 

Bhakra Dam-a tui a tam vangin a paihna hawn ṭhen a ni a, Sutlej lui a len phah avangin a hnaih vela khaw mipuiten tuilian an tuar mai bakah, an buh leh thlai chinah harsatna a thlen thu Punjab CM Amarinder Singh chuan a sawi. Hei hi kum 1958 hnulama tuilen nasat ber a nih thu a sawi bawk.

Sutlej lui lian hian chenna in te, buh leh thlai chinte leh thil tam tak hmun hrang hrangah a tichhia a, a bik takin Ropar, Ludhiana, Jalandhar leh Kapurthala a khaw 100 chuang awm te'n an tuar nasa bik.

CM chuan chhiat tawh thlenna hmuna officer-te hnenah an mamawh tur ang sum leh pai chu hriattir turin a ngen a, report thehluh tawh chinah khaw 326 te'n harsatna hi an tawh thu tarlan a ni. Tui lian hian buh leh thlai chinna ram acre nuai 1.20 zeta zau a chim a ni. 

Chhanchhuah hna hi National Disaster Response Force (NDRF) leh State Disaster Response Force (SDRF) te'n an thawk mek a, Jalandhar leh Ferozepur district te hian tuilian an tuar nasa hle. Mihring 5023 te chu hmun him lama sawn chhuah an ni tawh a, Indian army te hmalaknain thlawhtheihna hmangin tuilian tuarte ei tur ngaituah sak an ni bawk. 

Share this Post