Insumdawn tawnnaah hmalak zel a ni - CI Minister

Zokhawthara Land Customs Station tihchangtlun hna thawh meka tel pakhat, officer quarters sak thar chu August 19, Inrinni khan Commerce & Industries minister Dr R Lalthangliana'n a hawng a; insumdawn tawnna lamah hmalak zel a nih thu a sawi.

Dr R Lalthangliana chuan, ram dang nena insumdawn tawnna tura hmalakna kal zelah Land Customs Station, Zokhawtharah ruhrel ṭha tak buatsaih belh a ni tih a sawi a, "India rama land custom station 20 zingah Mizoramin pahnih - Zokhawthar leh Zorinpui a chang thei hi state economy tihhmasawnna tura thil lawmawm tak a ni. Kawrpuichhuah lamah pawh hmalakna lian tham tak kalpui mek a ni," a ti.

Zokhawthar leh a chhehvel chu Myanmar nena insumdawn tawnna hmunpui ber a la ni zel dawn tih sawiin CI Minister chuan, "Tun dinhmunah SASCI kaltlangin cheng nuai 1,500 hmangin hna thawh mek a ni a, hei hian kawng hrang hrangin hmasawnna a la thlen zel dawn," a ti a; sumdawnna hmunpui tihlawhtling turin Zokhawthar leh a chhehvel mipui hmalakpuiah a sáwm.

Bialtu MLA TJ Lalnuntluanga, minister of state pawhin thu sawiin, "State economy ṭhan len zelna turin ram dang nena insumdawn tawnna tihhmasawn a pawimawh. Zokhawthar border trade hi Mizoram economy innghahna hmunpui a la ni zel dawn a, chumi tur chuan sorkar pawhin ruhrel bun belh kawngah te, inkalpawhna siamṭhat kawngahte hma a la zel a ni," a ti.

Infrastructure Development for Border Trade Facilitation at Zokhawthar Project hi Special Assistance to States under Capital Expenditure/Investment (SASCI) 2020-21 sum nuai 1,500 hmangin thawh mek a ni a; Lushai Engineers-in April 20, 2023 khan an thawk ṭan a, thla 24 chhunga zawh tur a ni. Minister-in a hawn tâk officer quarters chu cheng nuai 216 sênga sak a ni.