ZPM-in street campaign an buatsaih

ZPM party chuan August 19, Inrinni zing khan Aizawla hmun pali - Chanmari kâwn, Dawrpui, Salem Veng leh Maubawkahte street campaign an buatsaih a, MLA Dr Vanlalthlana bakah, MLA candidate tura ruat dangte'n thu an sawi.

Salem Veng leh Maubawka thu sawitu Dr Vanlalthlana chuan, ram rorel dan a dik a ngai tih sawiin, "Miretheite rawktu, an chanái lak­saktute chan tur hi a rapthlak tak zet dawn. Ram roreltute hian Pathian hmaa kan sawi chhuah leh ngam tur kan tih ṭhin a ngai," a ti.

Sorkarna chelh mektute'n ṭhalai, mahni kea din tumte khaichhuah an tum danah an bangbo hle nia sawiin Vanlalthlana chuan, "Policy chu nei ve bawk mah se, a taka tihhlawhtlin hi a pawimawh lai a ni. ZPM kan sorkar a nih phawt chuan kutkawih eizawnna lama kan ṭhalai mahni kea dinchhuah tumte tan thapui kan thawh dawn," a ti a; Mizoram chu India rama kawng nei chhe ber, zirna lama chhe ber, kawlphethaa intodelh thei lo a nih thu a sawi.

Dr Vanlalthlana chuan, "Ram hmasawnna leh ruhrel lian siamna tur SASCI-te hi party inhlawh nan kan hmang mai mai a nih chuan kan ram hruaitute hian insawifiahna tur an la nei dawn a, mipuite'n zawhna zâwtin, chhanna dik an beisei dawn a ni," a ti bawk.

Aizawl East-II biala ZPM candidate tur B Lalchhanzova chuan, chief minister leh party president nih kawp an duh lo tih sawiin, "ZPM a sorkar chuan kan CM-in sorkar a enkawl ang a, party chu president leh headquarters mite'n an enkawl dawn," a ti a; kum 2018 inthlanah ZPM an pachhe hle mah se, tunah chuan bial tinah block, group, unit leh zonu leh ṭhalai unit ṭha tak an nei a, candidate tifel hmasa ber an nih thu a sawi.

B Lalchhanzova chuan, ZPM enchhin duhna thâwm a ring hle tih sawiin, thawhhopuiah mipui a sáwm a, "ZPM sorkar lo piang tur chu a langtlang dawn a, mipui náwlpui hian sorkar awmzia an hrethiam dawn. Mipui ngaithla ngamtu sorkar kan din dawn a, mipuite'n aw an neih theihna tur sorkar kan din dawn. Mipui sorkar tak tak kan din dawn a ni," a ti.

Aizawl West-II biala candidate tura ruat Lalnghinglova Hmar chuan, mipuiin hruaitu ṭha an mamawh tih sawiin, "Hruaitu ṭha kan neih chuan siamṭhat theih kan ni," a ti a, ZPM-in Mizoramah sorkar ṭha zawk an din theih an beisei a, sorkar ṭha din theih a ni tih lantir an tum thu a sawi.

Lalnghinglova Hmar chuan, Dik lohna ûmbo an tum thu sawiin, "Kan ramah eirûkna kan duh lo a nih chuan kan sawi ngam tur a ni a, eirûk do ngam ZPM vote turin ka sáwm che u a ni," a ti.